食物：$$$1/2
環境：$$$1/2
服務：$$$1/2
是夜的飯局，讓我回憶起十多年前剛出來「吃飯」的日子。
皆因搞手正是當年的食友，因為某些原因，大大話話十年八年沒見面，而今次選擇吃的食肆，也就是香港其中一間經典的酒家 - 鳳城！
一聽見鳳城呢個名字，許多人就會話有正版翻版，好多恩怨情仇，講到好似自己有份咁。這篇就唔多說呢啲，總之我今次去的，是北角鳳城。
感謝搞手打點好一切，我哋咩都唔使做，人齊開飯就是。打頭陣的鴻運乳豬全體端上桌時，回憶真係番晒嚟。乳豬做到皮脆肉嫩，個別一兩件可能咸少少，但大致正常發揮，沾上乳豬醬，連吞三件無問題。順德魚肚羹，經典的味道，除左魚肚，最喜歡就是有松子在內，多年沒有改變。再來的一道，餐牌上寫著鍋蝦拼炒奶，沒錯又是兩款鳳城的名物，炒鮮奶夠嫩滑，味帶點甜，蝦多士脆卜卜，蝦肉蝦膠與多士緊緊貼上，香口嘢一定岩我口胃。大良生菜包也是百吃不厭的招牌菜式之一。搞手在套餐之外追加了蟹盒，蠻大的份量，每人半件恰好。今次出品都可以，香脆沒有油益味。再來的骨香炒斑球，啖啖肉岩晒我呢啲唔識吮骨既渣仔，配角的西芹及草菇，又是舊式酒家才會見到的角色。
印象中鳳城的脆皮炸子雞在香港排名很高，今趙的至少也做到皮脆肉嫩，好吃但沒以前的驚艷，是稍微退步，還是我自己見識多左?上湯炸粉果又是愈來愈少見的美食，自己喜歡加少許上湯，讓粉果在微脆與軟腍之間遊走，可是今次的外皮有點點黏牙，大概是炸的時候既油溫問題。全晚最驚喜，竟然是單尾的鳳城炒飯，介乎西炒飯與揚州炒飯之間，但味道是預料之外的好，大家笑說是西洋洲炒飯。是夜的甜品，又是久違了的綠豆沙，味道唔錯，多點臭草氣息或更好。當然少不了西米焗布甸，十年如一日的味道，大大兜眾人分享，十分盡興。餐後大家不忘在經典的龍鳳禮堂之下合照，呢種感覺呢份滋味，可能要有番咁上下年紀的朋友才會明白。
餐廳資料：
鳳城酒家
北角渣華道62-68號高發大廈地舖及1樓
25784898
沒有留言:
張貼留言