2021年8月4日 星期三

梨泰院 - 自得其樂



食物:$$$1/2
環境:$$$$
服務:$$$1/2 

愉景新城的日本餐廳今助,長期拍烏蠅,睇到戥佢淒慘。

終於一天,見佢舖位封上圍板,結束營業,接捧既係間韓式餐廳,梨泰院。可能新屎坑既關係,某夜經過,幾近爆滿。

平日中午,趁有個空檔,單拖來吃個午餐。

點餐後,店員奉來四小碟。芽菜非我所好,我只愛肥嘟嘟的怡保芽菜。辛奇 (家陣唔可以叫泡菜啦!)辣勁不強,醃青瓜與漬白蘿蔔比較清爽合心,尤其是後者,在熱到幾乎中暑既時候吃幾粒,確實有助打開胃口。

原本想試人參雞湯,但天氣實在太熱,頂唔緊,退而求其次要個烤五花肉飯。不是亂咁炒埋一碟的頹飯,薄薄之五花腩一片片的砌好,燒得邊位帶焦,入口鬆化帶脂香,本身已經夠味,配上蒜泥甜辣醬,另一番滋味,特別喜歡夾著多些蒜茸來伴之,爽皮,懶理吃罷『呵氣如蘭』。

加件百爵茶戚風蛋糕,忌廉細滑不膩,戚風蛋糕輕怡,滲出陣陣百爵茶香,估唔到又幾有水準喎!

霸到個有利位置,邊呷口咖啡,邊看著商場大電視播放奧運,自得其樂。

銀銀詩蓓真係幾堅~


餐廳資料:
梨泰院
荃灣青山公路荃灣段398號愉景新城地下1019號舖


2 則留言: