MoMo Cafe - 轉型，半自助

 

食物：$$$1/2
環境：$$$$
服務：$$$$

有無發覺，疫情呢幾個月，多了酒店提供半自助餐?

香港萬怡酒店的Mo Mo Cafe 是一例。

頭盤、水果、雪糕及果汁咖啡在外邊自取，凍海鮮盤及汽泡酒按人頭奉上，主食則是畫紙仔，食幾多畫幾多。

事不宜遲，睇睇佢既海鮮盤，呢個係四人份量，龍蝦、生蠔、蜆肉、青口、海蝦、翡翠螺及蟹腳等，陣容非常鼎盛，睇見流口水。波士頓龍蝦勝在爆多羔，龍蝦鉗自然更鮮甜。是夜生蠔是法國佳麗，正值合時。其餘的海鮮也大致新鮮，尤其是凍蝦。

一啖海鮮，一大口汽泡酒，爽皮！

頭盤選擇唔算十分多，勝在放得企企理理，唔會一大班人走去搶。芝士有兩款，分別為平易近人的Emmental，與及性格剛烈的藍芝士。各式沙律新鮮，特別欣賞爽甜的蓮藕片，狂擦肉類之前來點菜蔬，心理平衡一點。另外，竟被我發現有惹味的韓式泡菜，唔執輸又來些少。

中湯西湯，任君選擇，若你是湯怪，兩款試勻亦無不可。

主食有肉類、魚類，以及Pasta。四條友，每款要二人份來分甘同味。Pasta有長通粉，但我更愛吃濃郁又飽滿的意大利雲吞。

肉類方面，西冷牛扒、豬肉眼扒、羊腿扒、巴馬芝士雞排、雞胸及鴨胸等，非常豐富。每樣吃一口，足以飽到上心口。當中以嫩口的意式香烤羊腿扒，最為合心。

煎魚和烤三文魚，同樣交到功課。

要挑剔的是沒有甜品供應，只得幾款生果，同埋雪糕而已。幸好，雪糕係優質的Movenpick。

總括而言，三舊水樓下的收費 (已包加一)，單是吃個凍海鮮盤及飲杯汽泡酒已值回票價。另外，只要惠顧此半自助餐，可加八十八個大洋來多半打法國生蠔，呢個真抵玩！

餐廳資料:
MoMo  Cafe
西環西營盤干諾道西167號香港萬怡酒店
37178989