Cafe Circles - 便宜到無朋友

食物：$$$1/2
環境：$$$1/2
服務：$$$1/2 

經濟不景氣，家吓唔少酒店/ 餐廳的優惠，力度大到嚇親人，荃灣如心酒店的Cafe Circles是一例。

有幾便宜先? 你或者會問。

三道菜的龍蝦套餐，盛惠二百三十九個大洋 (另加一)，仲包埋咖啡或茶，是否有時光倒流二十年的感覺?

你既第二個問題，可能會是：係咪將貨就價?!

我親身試過，認為物超所值，同大家分享下。頭盤可選沙律或湯，朋友點既沙律，數伋大蝦放在一堆藜麥之上，賣相十分精緻。起初也疑惑咁多藜麥會唔會『太健康』。因加入了黑醋，味道又唔錯，再連同爽脆的大蝦放入口，蠻醒胃的，頂頭的青蘋果片，亦添一份清新氣息。

筆者則被餐牌中的粟米忌廉湯吸引著。平時我大都唔會揀湯，但對粟湯既抗拒能力實在極低。濃郁而混入粟米粒的出品，由細喜歡到現在，酒店的出品當然又會搞啲花臣，伴一條鬆脆的多士及一些點綴，豐富了層次。

龍蝦扁意粉與意大利飯之間，我挑前者。原身是半隻的波士頓龍蝦伴扁意粉，我加了八十元來夠全隻。意粉始終不是手造，質感稱不上一流，至少保持咬口，伴上檸檬牛油汁，合格的。龍蝦烤得香噴噴，肉質亦唔會好韌，且有頗多羔，有驚喜！

甜品只得一款，不用煩惱。青蘋果造型的出品，十分美觀，內裡是抹茶慕思及青蘋果啫喱，味不過甜，再配以微微帶酸的青蘋果泡沫，睇得又食得。

以為龍蝦餐便宜到無朋友? 其實佢仲有一個終極優惠套餐，同是三道菜，主食係雞/魚，索價一百四十九 (另加一)，甜品係呢款柚子蛋糕，絕不欺場。

係咪好痴線呢?

餐廳資料:
Cafe Circles
荃灣楊屋道8號如心海景酒店暨會議中心9樓
22802868