2020年7月1日 星期三

W28 Steak House - 鋸扒


食物:$$$1/2
環境:$$$$
服務:$$$$

父親節,例牌約埋阿妹一家齊慶祝,老人家見到孫女會開心啲。地點要遷就小朋友方便,不宜走太遠,所以食在將軍澳。

阿妹熟地頭,索性叫佢揀間餐廳,反正大家都唔係志在食。

佢提議左兩間,一中一西,均藏身在九龍東智選假日酒店裡頭。中餐廳嚐過幾遍,飲茶晚飯都試過,今次不如食下西餐?


景觀開揚,然而大家都不會在意,因為眾人的專注力早已落在小朋友身上。


午餐的頭盤可挑沙律、焗田螺或者是日餐湯,老派扒房的感覺。我既選擇係白湯。焗田螺上桌香噴噴,忍不住試了一粒,軟腍而充斥牛油香,不俗。


是日餐湯係周打魚湯,濃稠合宜的湯頭,內有魚肉、細蔥、紅黃椒粒等,很足料,喝下去和暖舒服。


作為牛魔怪,又來到鋸扒的地方,無理由唔食牛扒吧。午餐有西冷、肉眼,甚至牛脷扒的選擇,心大心細,好想食牛舌,但來到扒房似乎食西冷或肉眼比較正路,最終還是決定要最穩陣的肉眼扒,按老闆的建議來個五成熟。

火候控制沒有投訴,至少入口唔怕韌,味帶脂香,二百蚊有找的套餐價,收貨了。大家都笑說幼身的薯條似老麥出品,當然味道是好十倍,起碼夠熱又有薯香。配角的西蘭花、紅白蘿蔔我都一拼清掉,尤其是白蘿蔔,清甜無渣。


店員話佢哋既豬扒都好出色,所以老豆就要了豬扒意粉。是鬆化,伴以磨菇汁醬還好,係嫌佢薄身左啲。


甜品四款,竟可選擇法式橙酒煮薄餅,那就不作他選。只有一片,然而入口軟熟,橙香酒香平衡得宜,還有絲絲橙皮的澀,成件事效果唔錯,雖不是堂弄,也都滿足了。

咖啡味很濃,要讚奶是熱的,絕不馬虎了事。


小朋友食了半碟意粉,店員仲送佢一球朱古力雪糕,發達了!


餐廳資料:
W28 Steak House

4 則留言: