新店速遞：浮生 - 匆匆過客

食物：$$$1/2
環境：$$$1/2
服務：$$$1/2

近排的Cafe開得太多太快，口袋有一大串想光顧的咖啡室，追也追不上。這天，就跟在奧海城返工的好友去了浮生吃午餐。

節錄自李白的《春夜宴從弟桃花園序》： 『夫天地者，萬物之逆旅也；光陰者，百代之過客也；而浮生若夢，為歡幾何。』

大概是指，我們只是匆匆過客，人在世的得失榮辱只是一場夢，沒什麼值得歡喜、留戀。

既然如此，我又試下放下執著，享受人生吧！

然而，享受人生並非想像中般容易，即使我們十二時許來到，已經要等位，仲差啲過唔到體溫檢測，被拒於千里之外。

等待期間，已經諗定食乜，所以一安頓好，便可立即去柯打食物。一款定食套餐，一個烏冬，問店員攞隻碗仔，大家分甘同味。

定食的內容稱不上豐富，關東煮加兩隻飯糰，以及兩入小食而已，大男人好可能會唔夠飽。而小食的附骨腸，相信是來貨。

關東煮，相信是穩陣的選擇，獅子狗及芝心魚豆腐味道是預期之中，蘿蔔反而唔夠清甜腍身。

兩件飯糰，長身的一件是混入了肉鬆，另一個則完全沒餡料，不過沾上了濃香的醬油蛋，頓時變得美味，甚至是整個套餐最誘人的項目。

好友原本想吃雞扒烏冬，可惜售罄 (定係未準備好?) ，唯有改要冬蔭公蝦肉伴烏冬。就是有一點辣，但無甚層次，大概是包裝冬蔭公湯底，加些獅子狗、蝦肉及本菇等，便拿出來奉客，個人不太懂欣賞。

好友想食甜，樂意奉陪到底，一件焙茶芝士蛋糕兩份分。焙茶氣息消失得無影無蹤，少許芝味作為補償。

我要杯Dirty，老友就飲凍既花香伯爵茶，作為午餐的終結。

原本大家有時間可以再坐一會，但見到等位既人龍，還是不要阻住地球轉。

我返番我既火星~~

餐廳資料:

浮生

大角咀晏架街8號地舖