食物：$$$1/2
環境：$$$$
服務：$$$1/2
某天扭開電視，節目主持人正在訪問一位城中名廚，那位仁兄，就是翠亨村的湛師傅。
不諱言，對湛師傅無乜認識，我嗰年代既翠亨村，總廚仍是陳達強師傅，可想而知是多少年前的事。
時代在進步，翠亨村也不像往時，至少環境裝修變得新潮，綠白色的經典格仔枱布早已被取締。
再次踏足翠亨村，為的是我喜愛的片皮鴨。疫市期間，大部份餐廳都推出很大力度的優惠，平到你唔信，翠亨村就四人或以上晚飯消費，送片皮鴨一隻。
贈送的片皮鴨，只是一食，若要有炒鴨肉或者生菜包，加錢便可。不過我哋窮到燶，就沒有再要二食。隻烤鴨唔得漲卜卜，幸而肉質鬆化，麼麼皮軟熟熱度足，夾著京蔥與青瓜，塗上鴨醬，仍是不錯。
叉燒忽然成為飲茶食飯既必備之選，這晚我們亦沒有走漏。半肥瘦燶邊靚叉，入口仍保持彈性，蜜味足，肯定受歡迎。旁邊放上的蜜豆，家陣已愈來愈少見。
窩貼牛奶拼均安魚餅，是翠亨村多年來的招牌菜色。魚餅質感彈牙，喜歡的話可醮少許蜆芥醬同吃。大口咬下窩貼牛奶，柔軟又鬆脆，雙重口感，只是牛奶的味道稍為甜了一點，那片火腿起不了太大作用。
翠塘豆腐其實也是很多年前的菜色，豆腐粒夠滑，面頭就是蝦肉、帶子及菜粒，加埋個芡汁，是正宗的出品。
單尾要個韭黃銀芽肉絲配煎麵，麵底做得香脆，配杰撻撻的汁醬又得，但我更喜歡下少許醋同吃。
見到有合桃酥，又忍不住點了。入口未算十分鬆化，又令我想起深水埗老餅店八仙的出品，看來係時侯去買番兩盒，在疫境中慰勞下自己。
桂花薑茶湯丸既甜湯，個人真的接受不了，寧願吃個壽包，仲好！
不要挑剔我說壽包而不叫壽桃，唔該~
餐廳資料:
翠亨村
睇呢篇令我有啲心郁郁想食中餐添，不過近期真係難啲。^^”
回覆刪除總有機會的
刪除送鴨真抵食！
回覆刪除係呀...
刪除