老掌櫃 - 片皮鴨的魔力

食物：$$$1/2

環境：$$$1/2

服務：$$$1/2

困在家太久，人快要發霉，今個星期日，決定放棄住家飯，齊齊出街食。

同老豆食晚飯，總走唔出荃灣，海之戀係佢呢期既新寵。

商場云云食肆之中，揀中老掌櫃東北菜館，原因好簡單，片皮鴨正在做特價，老媽子睇見流晒口水。

        

三條友，全隻片皮鴨太多了，半隻即可。這類地方，當然不會分淨皮、淨肉及連片帶肉般仔細，麼麼皮頗厚，來得有少許韌，還幸烤鴨皮香肉鬆化，夾上青瓜及京蔥絲，塗上鴨醬，以呢個價錢去計，交足功課有餘。

老媽子點來紅燜豬手，份量唔少，色澤紅亮，豬手既皮緊緻又爽口，肉質保持軟腍，滲出點點甜味，是很好下飯的一道菜色。

炒窩筍與干煸四季豆之間，我必定選擇後者。皺晒皮又油滋滋的四季豆，加埋肉碎，最岩重口味的朋友，我甚至嫌佢煸得未夠香口惹味。

個人對簡單的蕃茄蛋湯麵一向情有獨鍾，呢度既出品，還加入了木耳及肉片，對我而言唔會特別加分，反而麵條太軟腍，要扣點分數。

來的時候還以為店子生意麻麻，但七點半離開，目測已有四、五十人在等候，非常誇張。

完全有疫市發圍的感覺。

餐廳資料:
老掌櫃東北菜館
荃灣大河道100號海之戀商場2樓2006號舖
35431618