海外篇：Sooksiam - 複製了外型

食物：$$$1/2

環境：$$$1/2

服務：$$$$

兩年後再次踏足曼谷，其中一個打算到訪既目的地，係昭披耶河畔的新地標 - Iconsiam。

集購物、美食與娛樂於一身的超大型商場，逛一日都逛唔完，單係講食，五樓及六樓已有勁多的特色食肆，全球菜色幾乎都可在呢兩層搵到，其中名店Nara，同埋人氣甜品店After You，都設在這裡。

G/F及U/F的Sooksiam，其實更有賣點，因為佢係將泰國的水上市場，整個搬進室內。

        

難得一場來到，就在地下的 Sooksiam食，畢竟五、六樓的食店，在泰國其他地方也可以找得到。

船河、咖喔麵、串燒、粿條及小吃等應有盡有，選擇困難症好容易發作。

隨意搵一檔便是。黃咖喱什錦麵，內容包括豬肉丸、牛腩、雞腿等，面頭的脆脆絲令呢碗麵生色不少，粗麵難得地無鹼水味，咖喱湯底味道似曾相識，我覺得好似大快活的咖喱，但辣勁要強一點。

可能係肚餓，試了少少另一碗的雞腿湯河，感覺都唔差。

串燒價錢同街邊檔差不多，惟缺少了炭火香，風味自然有所不及。我寧願返出街邊食炭燒雞腎、雞肝和豬肉丸。

菠蘿乾、芒果乾、糕點等乜乜乜，隨便試食，岩食先買回港做手信，只是我食完已飽了一半。

無疑，是花了不少心思時間金錢將整個泰國最具特色的東西都搬進來，但我始終更喜歡地道的原汁原味。

外型可以複製，風味卻是無可取締~

你可以話我食古不化。

食肆資料:
Sooksiam
G/F & U/F 299 Charoen Nakhon Rd, Khlong Ton Sai, Khlong San, Bangkok