2019年7月5日 星期五

Holt's Cafe - 父親節,食呢D~



食物:$$$1/2
環境:$$$$
服務:$$$$

一路以來,我家也不是正日慶祝父親節,尤其是今年。

不過,呢餐飯,係一定會食,爭在遲定早啫。

老豆偏好西餐,老媽子無茶飲唔掂,同阿妹傾過,不如試試新酒店既Holt's Cafe?食中食西食點心,悉隨尊便。
     


由燒味講先,例牌都係點叉燒喇。鬆化既,有點肉香既,少許燶邊既,家陣酒店閒閒地三幾百蚊碟,呢度只收百六,無咩好投訴。


全部點心均六十蚊/份,但選擇當然不及中菜廳那邊豐富。蝦餃、燒賣、叉燒包,以及蛋撻仔,統統唔放過。蝦餃和燒賣正常發揮,至少用料是靚,粒粒飽滿,叉燒包包身軟熟。蛋撻仔最強差人意,正如老豆話齋,寧願去金園整件仲好。


店員極力推介海南雞,話係招牌菜。是皮爽肉嫩,油飯甘香,配三色醬係好味。之但係,與城中最佳的Grand Hyatt出品相比,仍相差一截。


瑤柱蛋白炒飯,足料非常,而且炒至爽身,外甥女BB都食一大碗才收手。


老豆還是點一份西式嘢,香煎鱈魚。鱈魚肉嫩是預期之中,皮煎得香脆,以菠菜及茄蓉墊底作點綴,蠻好的。似乎,這裡的西餐是比中式嘢要來得耍家。


見甜品餐牌之中,有一款Tart of the day。問店員會是什麼,正正是我最愛的芒果撻,那就不作他選。賣相是美,少許金泊馨添貴氣。然而,撻皮是有點兒硬,還幸芒果沒有太酸,但我覺得可以更好的。

有機會,去試埋中菜廳彤福軒,據聞好難訂位的。


餐廳資料:
Holt's Cafe
尖沙咀梳士巴利道18號香港瑰麗酒店2樓
38918732

5 則留言: