Ulyssa by Aldou - 億利另一人氣店

食物：$$$1/2

環境：$$$$

服務：$$$$

當週末打波地點由長沙灣正式移師至荔枝角後，筆者多了在該區搵食，當中包括食肆林立的工廈億利。

千祈咪睇少廠廈的餐廳，生意絕不遜色，如程班長咁，排隊是必然事，咪便旨意Walk-in可以食到。

兩點鐘來到了這家Ulyssa by Aldou，仍然幾乎爆滿，好彩攝到張兩人枱。

    

選好了食物，店員奉來餐湯，看上去像南瓜湯，喝起來卻是帶酸的，原來是蕃茄湯才對，湯不可以貌相。

我挑的主菜是豬扒，可是剛剛點好餐後，聽到鄰桌的客人投訴她那份豬扒唔熟的，完全切唔開。此刻的我，滴了兩滴汗，只希望我嗰份唔好出事。

厚切的豬扒，是熟的，是過熟的，有點兒韌，要花氣力去咀嚼。但調味還可，青蘋果茸汁醬討人歡喜。

朋友的和牛芝士竹炭漢堡，除了牛肉芝士及蕃茄甜生菜外，仲有隻太陽蛋，同埋洋蔥圈在內，感覺豐富。切了半來試，包身鬆脆可口，牛肉沒特別驚喜，至少厚身又唔怕乾巴巴，比豬扒要好了。

沒有點咖啡提神，只喝熱檸檬茶消滯，陣間輸波有藉口，哈哈～

接近三點，人潮漸散，我哋都係時候要開波了！

餐廳資料:
Ulyssa by Aldou
荔枝角長沙灣道883號億利工業中心2樓203室
24880833