2018年7月2日 星期一

海外篇:大鍋頭 - Nice to MEAT you



食物:$$$1/2
環境:$$$$
服務:$$$$

美術路一帶,是中高價餐飲的集中地,我當然要親身去體驗下。

中日韓泰意法,咩菜色都有得食,容易選擇困難症發作,我狠下決心,鎖定去食火鍋,不會轉軚。

呢間大鍋頭海鮮鍋物好犀利,晚上六點未到已坐滿客,店員著我留下姓名電話,四十五分鐘後再回來。
    


在餐牌上,看到有款 『肉圈圈、海洋洋』的套餐,聽個名都知呢款會好岩我,不作他選。


點好餐後,醬料及飲品就在外面的自助吧拿,飲品雖只得橙汁和冬瓜茶,不過無限任飲,仲想點?


調好醬料,嘢食開始送來了。所謂肉圈圈,就是將肉一片片的鋪在鍋邊,讓人感覺震撼。

套餐原本是跟豚肉的,但我加了一百元台幣,轉成牛肉,吃得更滿足。尤其是呢個湯底係壽喜燒,始終是配牛肉才更合襯。

坦白說,牛肉不是什麼高質素靚牛,不過一塊一塊咁在甜甜的壽喜燒湯底上輕輕拖熟,食肉獸總覺得是種享受。


套餐中的海洋洋,實際上是海鮮拼盤,內容有扇貝、魷魚、蝦、蛤蜊與鯛魚,擺得算靚仔。

用料是新鮮的,蝦夠爽口,蛤蜊漲卜卜,配海鮮的是昆布鍋底,沒什麼要投訴。


大魚大肉後,還有份蔬菜拼盤,平衡一下。粟米仔、什菇與豆腐,好吃。


怕你唔夠飽,套餐仲會跟埋白飯或者烏龍麵(即烏冬)。


最後,送上的甜點,是綠豆沙,可惜沒臭草的氣息,溫度唔熱唔凍咁,溫溫吞吞。

食到咁樣,平均消費係港幣一百個大洋,已算是當地中價餐廳,我無話可說。

餐廳資料:
大鍋頭
台灣高雄市鼓山區青海路201號
(886)75523225

5 則留言:

  1. 呢餐真係好扺食呀!香港依家食野真係太貴啦!

    回覆刪除
    回覆
    1. 呢餐真係好扺食呀!香港依家食野真係太貴啦! x2

      所以不斷去旅行,因為在香港想食好少少的價錢,已經夠飛埋去好多地方食正野啦

      刪除
    2. 香港真係貴, 下次組隊去馬拉!

      刪除