南華軒 - 實而不華的瑰寶

食物：$$$$
環境：$$$$
服務：$$$$

有番咁上下年紀既我哋，始終有個中餐胃，好多時相約聚會，都好想揀些手工中菜來吃。

南華軒是其中一個我們的聚腳點，皆因師傅功夫扎實，大家吃過咁多次都無乜點失拖。

感謝朋友預先訂枱及寫好菜單，我最喜歡就是餸來張口，懶到出汁。

打頭陣的前菜三點，舟山海蜇帶點辣勁，有助打開胃口；荔枝龍蝦球好巨型，除左蝦膠，也真的混入龍蝦肉在內，吃起來脆口彈牙，同時亦鮮味滿分。XO冰鎮鮑魚香氣洋溢，師傅好細心地將鮑魚切片，吃時更方便。

豐富晚餐自然不乏湯品，水米皇湯遼參，口感爽彈的遼參固然是好，師傅加入雞湯，令健康的小米多一份鮮甜味，個人罕有地將整碗湯喝清光。

接著來的骨香大桂花，用上斤兩十足的桂花魚，火侯控制得好，肉厚但口感嫩滑，炸香的骨位又是另一番滋味，伴上西芹作點綴，有睇頭。

火焰蝦乾津白焗奄仔乃視覺、嗅覺及味覺的多重享受。經理在席前加上珍酒，做出火焰效果，同時香氣滿瀉，奄仔鮮嫩清甜，蟹羔口感軟綿，甘香不膩。墊底的津白好夠腍物，幾近入口即化，且索盡奄仔蟹既精華，肯定好吃。

無雞不成宴，曾經在這裡吃過鹽焗雞及古法金華玉樹雞，皆拍案叫絕，今次還原基本步，來隻黃金吊炸雞。皮脆肉嫩亦夠味，仲有不同顏色的蝦片，回憶真係番晒嚟。

經常吃炒飯炒麵也會生厭，單尾搞搞新意思，來個豉椒蟶子炒刀削麵。蟶子與刀削麵的色澤及外型均有點相似，吃這道，有如在大埋爽脆鮮嫩的蟶子堆中尋找麵條，有趣有趣！

甜品的紅豆沙，是煮得起沙，豆也成渣，未必人人喜歡這口感，但我就覺得好正，甚至想「安哥」一碗。

人愈大，愈珍惜每次相聚的機會，見大家也吃得盡興，就足夠。

餐廳資料:
南華軒
油麻地衞理徑6號南華會網球部地舖
93808187