Imasa - 沒計劃下的一餐好西

食物：$$$$

環境：$$$$

服務：$$$$

打算睡到自然醒的一天，可是人算不如天算，被樓上鑽嘢聲吵醒，心裡講左幾句粗口之後，決定要去食好西。

臨時臨急，到底食咩好呢？忽然醒起久違了的半島酒店日本餐Imasa．．．

Whatsapp問下餐廳話事人Jack少仲有無位，轉個頭便收到回覆， 『無問題，起留位』。

這是我食過咁多次，遇上最多客人的一次，幾乎每枱客均是Jack少的忠實支持者，有佢係度，好過搞什麼Loyalty Programme。

每次來也不用費神，請Jack少發辦便是，從來沒令人失望過。

    

奉上的前菜，豆腐煬韌帶微甜，夾埋鮮美松葉蟹，及爆汁三文魚籽，乃精緻有趣的好開始。

之後，是刺身時間。驟眼看，見到海膽、蝦和三文魚，其實仲有帆立貝，以及躲在葉子下的池魚。

池魚是整個頭盤之中我最喜歡的，無得輸。三文魚只勝在是厚切，蝦與帆立貝均鮮。看見海膽之下是很厚身的青瓜，我在想，為什麼切薄片青瓜，連海膽一口過吞下不是更好嗎？

原來，青瓜是挖空了的，放上更多份量的海膽，師傅別有用心。只是，海膽的鮮美，未曾爆發。

平時，我多半會吃燒牛肉，這幾天忽然好想食Sukiyaki，懶理是炎炎夏日。

誘人的窩物外，仲有漬物、味噌湯、茶碗蒸，同埋白米飯，好豐富。

蒸蛋是意料之中的嫩滑，混入蟹肉及冬菇，水準依然。

用上頂級的和牛，軟腍是必然，伴以濃甜的湯頭，人間美味，若有隻生雞蛋在陣中的話，便完美。除了和牛，各式蔬菜索盡湯的精華，同樣可口。

半島既雪糕清新、多柚子肉，真係巧巧味呀！

食一餐好西，足以平復我被晨早吵醒的惡劣心情。回家，再午睡！

餐廳資料:
Imasa
尖沙咀梳士巴利道22號香港半島酒店1樓
26966715