六公館 - 揉合嶄新與古典

食物：$$$1/2

環境：$$$$1/2

服務：$$$$

早前飯聚，有食友問我係咪少見左外甥女，話呢排唔多覺我Post佢啲相片上Fb。

估唔到大家有留意我既Facebook的。無錯，呢期公私兩忙，少了與BB見面，趁母親節將至，又有機會一齊飲茶。

例牌由我選擇餐廳，我既第一個念頭就是六公館，環境舒適不在話下，又有戶外草地讓BB走動下。

慶幸天公造美，可在外面的草地玩一排影一輪相，才入去飲茶。

    

餐廳分兩邊，一落扶手電梯的左手邊，是用餐區，另一邊雖有小量座位，卻是飲嘢為主。

飲茶食燒味，是近年的指定動作。餐牌中看見有鳳肝，雙眼馬上發光，不過老豆唔食雞，齋睇我哋食都幾戇居，還是要回叉燒好了。可是，呢碟叉燒又硬又韌，仲要無味，斗膽賣$288，直頭要高呼回水。

落筆打三更，希望只是偶爾失手，接著來的點心可以挽回分數。點心上得很快，一下子放滿整桌。金網鵝肝蝦卷，咬落鬆脆，蝦肉成份多，頗為爽口，可以鵝肝醬太少，否則應該更好。

竹炭流沙包，並不是這裡首創，不過賣相真心型格。趁熱食，包身軟熟，搣開夠流心，奶黃餡香濃，佳作。

另一款包點，雪山叉燒包，同樣可口。吃起來鬆脆，叉燒餡不硬，而且蜜汁甜美。

花枝米網腸粉，跟近年流行的春風得意腸是朋友，只是米網春卷內換上花枝餡。這腸粉雖薄，整體味道尚可。但個人認為，花枝餡總不及蝦肉，是我接受能力太低了吧～

蝦餃燒賣大概是飲茶的必備項目，呢度既燒賣，賣相與市面上的出品沒大分別，其實內在乾坤，是混入了黑蒜，岩晒又要食又要講健康的香港人。

蝦餃也造成黑金外表，是要仿傚竹炭流沙包的格調嗎？全蝦肉的蝦餃，始終不是我杯茶，有點豬肉餃的出品才是皇道。

隨之而來的，和牛黑椒酥，外層鬆脆可口，黑椒味道適可而止，混埋和牛，是想安哥的一味。

單吃點心或者會唔夠飽，叫個碟桂花蟹肉炒米粉做個保險。新竹米粉炒得乾身，顯示師傅的基本功紥實，若能有多些蟹肉，感覺便圓滿。

各自點上喜歡的甜品，我的楊枝甘露無甚驚喜。菠蘿柚子雪葩，查實更似雪糕，味道反而仲吸引。

本打算食完再同BB玩多陣影多幾張相，只是外甥女敵不過睡魔，Zzz Zzzz Zzzz...

下次吧！大把機會。

餐廳資料:
六公館
尖沙咀廣東道3-27號海港城海運大廈地下OTE 101號舖
2577-1668