新滬坊 - 又是開年飯

食物：$$$1/2
環境：$$$$
服務：$$$1/2

開年飯真是個好好的藉口，呢個朋友搵下，嗰個朋友約下，筆者今年不知吃了多少餐開年飯/ 春茗。

這一天，中午已經出動，去會展的新滬坊，與灣仔工作的朋友開年。

召集人似乎有一定號召力，中午也有一圍朋友仔參與，有些朋友真係好耐無見，所以見面大家都雞啄唔斷。
 

齊人便開始，大家時間都緊迫。先上四式冷盤，一隻四格的方碟，擺放著小份量的很吸引的涼菜。海蜇頭爽脆，無錫脆鱔鬆脆不硬，黑松露燻蛋做出溏心效果，煙燻香氣十足，頂頭的松露添貴氣。

跟著飲個湯，清燉獅子頭，喝得舒服，獅子頭屬迷你Size, 質感唔會死實實，我罕有地整碗喝清光。

再來是我最喜歡的上海菜色之一，蜜汁火方。以鬆軟包身夾著的兩片火腿，口感鬆化，但可以更甘香，不過加埋甜美的桂花蜜，仍然可口，脆響玲有助豐富口感。

接下來的兩款，並不是滬業，而是川菜。酸菜魚，用上的是桂花魚，肉質一定滑，但無甚個性，配酸辣正好。而這道酸菜魚，實際上是改良版，不是大兜酸湯浸著，但味道合格。

香辣花椒蟹，原隻蟹上自然誘人，附有一堆辣椒花椒，看上去會嚇怕不能吃辣的朋友，但我們就愛死了。吃起來很惹味，而且愈食愈刺激，愛辣的朋友要注意。

翠綠的芥蘭苗全挑選最嫩的位置，必定好吃喇～

每人一粒湯汁豐盈的小籠包，以及一小碗擔擔麵，我反而覺得擔擔麵有點糊口，可以更好。

甜品的黃豆餅軟糯，腰果露加入了薏米，香甜全油益味，食埋湯內的兩粒黑芝麻湯丸，滿足矣。

吃過開年飯，大家又各有各忙，齊齊努力吧！

餐廳資料:

新滬坊

灣仔港灣道1號香港會議展覽中心1樓

25827332