Osteria - Tapas，不限於西班牙

食物：$$$1/2

環境：$$$$

服務：$$$1/2

喜歡西班牙Tapas，原因太簡單，細細碟又多款式，可以試多幾味，最適合細食又花心既我。

肚餓可以食多幾款，有時收工無咩胃口，少少地三兩碟加埋飲品又得，好Flexible。

時代進步，餐飲也在不斷進化，Tapas已不再是西班牙的專利，金域假日酒店的意大利餐廳Osteria，最近都推出了意式Tapas。

    

人強馬壯之夜，可以試好多款Tapas，食埋主菜和甜品都仲得，認真開心熱鬧。

咸香軟熟的巴馬火腿，從來討我歡心，加埋軟芝士，又是另一番滋味。不過講到濃味，煙三文魚伴羊芝士紅菜頭沙律就更強，羊芝士的味道，喜歡的會愛不釋手，但不是人人接受到，沒有中間位。

Beef Carpaccio，是傳統的意式風情，店方鋪上黑松醣片使其更矜貴。西班牙有Pintxos，呢度既蕃茄多士伴沙甸魚，大概是變奏版，這組合自會來得較醒胃。

羊肉球炒什菇與銀鱈魚慕絲扒玉米餅，頂頭同是加上黑松露，增添貴氣。羊肉羶味唔算重，勝在不怕死實實，炒什菇亦來得爽口好吃。在松露之下，隱約找到些像西蘭花的物體，看真點原來是鱈魚玉米球，有趣。

藍青口鮮嫩飽滿，汁醬更不要浪費，塗麵包最為正路。

吃了多份Tapas，再叫幾款主菜大家開心些牙。不過，主菜來之前，先喝湯。以我既食量，飲埋個湯應該可以收工，所以同樣要與朋友分享。海鮮蕃茄湯，辣度溫和，配合自然的酸味，幾開胃，各式海鮮水準都合格。

作為食肉獸，主菜點上肉眼扒是理所當然的事吧！是美國產地，肉味更濃。外層燒香，我有幸分到件大的，感謝朋友既關照。此份扒還會配上巴馬臣芝士片及火箭菜讓大家平衡下，感覺健康點。

海鱸魚是不吃牛的朋友之選擇，賣相精緻，可惜魚皮煎得未脆香脆。

相比起意大利粉，個人其實更喜歡吃Gnocchi，粒粒煙韌的口感，配以醒胃的醬汁，好難會唔好吃。

又點了兩個薄餅，海鮮薄餅的味道合符預期，只是重口味既筆者，更情迷於濃厚的辣肉腸藍芝士薄餅。

咳嗽未癒，甜品要Pass了，以一杯熱檸檬茶作結，同樣滿足。

餐廳資料:

Osteria
尖沙咀彌敦道50號金域假日酒店閣樓
2315 1010