2017年10月7日 星期六

新店速遞:蘇媽蘇媽馬來西亞茶餐室 - 不妨去盡點吧!


食物:$$$1/2
環境:$$$$
服務:$$$$

先講一下,蘇媽蘇媽有兩間店,同在深水埗,分別在桂林街以及基隆街,大家約人請認清楚,咪搞錯地方。

這篇,集中火力說基隆街的新店,蘇媽蘇媽馬來西亞茶餐室。

新店的地方要大一些,食物選擇亦多一點,唔需要再坐街邊食得咁辛苦。

新屎坑,都預左要排隊,但真係估唔到要足足排五十分鐘才能入座,大概是我近十年等位搵食的紀錄。期間更發生小插曲,由於太多人排隊,旁邊的髮型屋報警指阻住佢哋做生意,有人痾屎唔出賴地硬。
     


新店的裝潢,與檳城的茶餐室好接近,就是多了冷氣,香港人要比馬拉人幸福嗎?



排隊之時已看了餐牌,大致選定想吃的東西,坐下立即可以落柯打。小食的魚仔醬啦啦,蜆仔肉嫩而味道鮮,最重要是香辣的魚仔醬,成件事的靈魂所在,教我一隻駁一隻的吃,停不了口。



福建蝦麵,店主大概是怕港人吃不了太辣,將參巴辣醬分開上。不打緊,自行撈下去吧。湯頭是蝦麵的靈魂,喝一口,味是可以,感覺上層次較單調。麵條可選參參,正合我意。配料之雞蛋、豬軟骨、蝦、魚片及芽菜等,屬正常發揮。在港吃到這個水平,收貨有餘了。



肉骨茶可選大骨、一字骨或三層肉等,今次先試一字骨。肉骨茶湯的藥材味頗重,但喝得舒服。更讚是店員雖然忙得不可開交,仍會主動幫我加湯,服務窩心。加上熱湯的肉骨茶,頓時好喝十倍。一字骨則是鬆化,我們還加了油炸鬼,與肉骨茶從來是絕匹啦!



仲想吃點甜,一記咖央多最適合不過,多士烘得金黃香脆,不過咖央醬可以放慷慨些吧,我覺得去得唔夠盡。



朋友對柑桔話梅水表示滿意,而我的拉茶,茶味濃,但煉奶偏少,我唔怕喝甜一點點的。


這店令我有再訪檳城既衝動。

餐廳資料:
蘇媽蘇媽馬來西亞茶餐室

6 則留言: