潮福蒸氣火鍋 - 同步過冬

食物：$$$1/2

環境：$$$

服務：$$$1/2

正所謂冬大過年，跟一班朋友齊齊做冬，一定要食好啲食豪啲啦！

有些朋友早兩日才打過邊邊，唔想打得咁密，所以大家決定，做冬就去潮福食蒸氣鍋。

香港家下周街都係蒸氣鍋，但據我所知，這種玩意，潮福才是鼻祖。

  

 

塞車，我差不多是最遲的一個，不好意思。人齊就開餐了！蒸嘢要時間，先來碟乳鴿，食住等。乳鴿皮香肉嫩多汁，比預期中出色，有個好開始。

蒸氣鍋當然以海鮮作主導，由於是任食，大家呢晚真係癲左，帶子、貴妃蚌、小象拔蚌，蒸完一輪又一輪，成品要鮮甜有鮮甜，應爽口既爽口，貝殼放滿一桌，好Crazy。

蟶子體型唔細，簡單配上蒜茸粉絲蒸熟，口感彈牙，原汁原味，不比豉椒炒遜色。

鮮鮑魚口感同樣彈牙，又沒有太韌，不會「趙」到牙骹都軟，但我留以有待，與好友分了半隻，滿足矣。

蠔也來了兩款，分別是美國桶蠔，與石蠔，個人較喜歡連殼的石蠔，會有更親厚質感。

當一隻又一隻龍蝦連身帶鉗放入蒸鍋時，大家又再起哄。嘟嘟嘟，夠鐘蒸好，打開草帽，整鍋紅紅的龍蝦，確實好有氣勢。我分到了龍蝦身，味道無問題，只嫌稍稍韌了些少，龍蝦鉗相信會好啲。

女士們恩物，花膠也要出場。在席各位女生如獲至寶，我也要識做，將我的那件，拱手相讓。

蒸氣鍋並不一定全蒸海鮮，什麼手切牛肉、和牛粒、雞件、各類丸子，以至瓜瓜菜菜，全都可以蒸。其實蟲草花蒸雞，來個蒸鍋做法，也可嫩滑的。

蒸馬拉糕也是大家期待的項目，一碟似乎不太夠分。

蒸完超豐富的海鮮與肉類菜蔬，粥底吸盡海鮮汁的精華，甜美程度，無法以筆墨形容。

最後，更有車媽媽帶來的超浮誇朱古力聖誕樹，連店員也忍不住走來影相。咁樣做冬，才夠盡興。

餐廳資料:
潮福蒸氣火鍋
深水埗欽州街94號黃金商場1樓全層
28119918