Follow me on Instagram

2016年3月17日 星期四

海外篇:Colony - 史上最強早餐



食物:$$$$
環境:$$$$
服務:$$$$

早陣子講過,新加坡Ritz Carlton的早餐,是史上最強。到目前為止,我無意收回這番話。除非,你能介紹更強的給我去見識。我會親身去驗証。

到底有幾強?我會認為,比起香港某些酒店的自助晚餐,更為豐盛,我一點也沒有誇張。

咁即係點呀?唔通早餐會有大量甜品,甚至雪糕咩?

正是。

OK,賣了很耐關子,即刻介紹啦!
 
可配三文治

不如由冷盤開始,Cold Cut的種類,已經不少,風乾火腿以致莎樂美腸,一應俱全。你可以淨食,或者請廚師幫你配上蕃茄、小青瓜等,弄成法包、三文治。當然,三文魚這基本嘢,必會有供應,而且仲有埋香草三文魚予你選擇。
 
勁芝味

筆者求芝慾頗強,呢度既早點,竟提供各式各樣的芝士,有軟有硬,有牛有羊,由平易近人到甚具個性的,悉隨尊便。每款取上一點,簡單的配上餅乾,已是很高享受。
 
為健康朋友而設

若果大家是健康的人,早上要吃麥片之類的東西,呢度都有得俾你。不過,咁健康,嚇屎我,我要跳過這欄了。
 
西式

想食熱嘢,大把選擇。中式的有點心,蝦餃燒賣叉燒包奶皇包,同腸粉,源源不絕的供應,唔使同人爭,水準亦佳。另外,還有蒸魚、炒菜等食品,以及白飯,真想不到朝早可以有得食咁既嘢。至於西式的,煙肉腸仔焗豆烤蕃茄,坎唔甩。我可以來份豐富的English Breakfast囉。
 
一定有蛋啦!

蛋,是少不了的項目,喜歡煎得、烚的、奄列乜乜乜,同廚子講就得。像黃大仙,有求必應。
 
正宗

星洲有少不印度人,酒店自會安排印度的食品,咖喱、薄餅,全是印籍師傅炮製,很正宗,但我胃納有限,只嚐了少許。
 
有粉有麵

有些人,如我老媽子,即使是早餐,也要有粉麵落肚既,呢度都唔會令佢失望。我反而覺得,有點過份了吧!
 
晨早流流食碗粥

晨早流流,斷估唔會食海南雞飯吧?那麼,海南雞粥又如何?OMG,竟真係有得食,仲要好綿滑好嫩,忍唔到口要食兩啖。
 
好似麵包鋪咁
Hey!好似無麵包呢?查實,佢個麵包陣容,我要用痴線去形容,基本上就是一間麵包鋪,咩嘢款式都有,我唔多講啦!
 
甜品都好多款

早餐,甜品又點呢?鮮果杯啦,奶凍啦,乳酪啦…… 想吃熱的?即制班戟又如何?要星洲風味的,斑蘭糕、椰汁糕、三色糕
 
仲有雪糕囉

最誇張的,是有雪糕囉~ 每樣一球丫,唔該!
 
好強~

你話咁樣既早餐,係咪史上最強呀?食完真係午餐晚餐消夜都可以Skip了。

餐廳資料:
Colony
7 Raffles Avenue, Singapore 

3 則留言:

  1. 真係好豐富! 雪糕係邊Brand呢?

    回覆刪除
  2. 求芝慾頗強--->笑咗!

    係每天供應定週末brunch嚟架?

    回覆刪除
  3. 你食完係咪夜晚嗰餐都慳返^0^

    回覆刪除