2015年2月8日 星期日

The Grand Buffet 自助山 - 款式超多的自助餐



食物:$$$1/2
環境:$$$$
服務:$$$1/2

談到食Buffet,相信很多人會喜歡,但聽到身邊很多朋友說香港食自助餐太貴又無乜嘢食,有時會專門一家大細去過大海,擦番餐勁既。澳門新葡京的自助山,是當中的經典。

澳門的自助山跟大家告別,但其實它並不是完全的消失於人前,最近,自助山就移師到灣仔合和中心62 (以前旋轉餐廳嗰度呢!),香港人真係好幸福。

這裡秉承澳門自助山的優點,就係食物款式超多,每樣吃一點點,足以令你爆肚而回。

六款刺身

咁多嘢食,都唔知從邊度開始講,搞到我都有D混亂,不如先睇下日本壽司及刺身。甜蝦、帶子、三文魚、油甘等六款,樣樣都好新鮮。另外仲有冷麵、八爪魚等等
 
回本位

即開

回本位當然就是海鮮欄,有齊啖啖肉的龍蝦,多羔鮮甜的麵包蟹,仲有長腳蟹,還有三款香港人最喜歡的即開生蠔,保証新鮮。單是這個「檔口」,足以令人尖叫。
 
我滿足了
個人很愛食芝士的,這裡有六款,有軟有硬,有濃郁有溫和,滿足到我有突了。
 
卜卜脆
相信去過澳門的人,都知道新葡京的燒味唔講得少,這精彩自會是延續來到香港這邊。燒乳豬件件皮脆又肉嫩,叉燒想食肥定食瘦,可跟師傅直說,會即時切俾你,迎合各人既口味,我梗係要食肥啲啲架啦!
 
點心小準不俗
我份人都幾傳統下,總會想食些點心,這兒的點心,即做,合晒心水。試了燒賣,企身,味道不俗;蝦餃晶瑩;拔兄大讚佢既蓮茸包超級美味。自助餐的點心能做到這個級數,無得彈。
 
好多嘢食
呢度既熱葷,都多到你唔信,而且質素都頗高,譬如有巨型彈牙的鮮蝦帶子炒西蘭花,又有香噴噴的薑蔥炒蟹,同埋高貴的蠔皇海參炆鮑魚,仲有各式各樣的印度咖喱,還有真心推介的炆牛尾,使唔使咁誇張呀?
 
要厚身D丫唔該~
Buffet,無理由少得了燒牛肉架,佢既火候控制得唔錯,食肉獸請留意,請留肚。
 
生生猛猛
要有粉麵落肚既話,不能錯過這邊。一個魚虹,裡頭的越南蝦隻隻生猛,即捕即煮,用來配粉麵又得,用來跟喇沙亦可,甚至乎就咁白灼都得。我,因為太飽,沒有將之配粉麵了。
 
即炸天婦羅
但,我肯定不會錯過跳跳紥既蝦,要了來整天婦羅,同樣是即叫即炸,保持溫度。天婦羅蝦是爽脆,其他的如青椒、茄子等,粉漿亦沒有過厚,好吃。
 
燒鵝肝
未完,旁邊是即燒的好東西,燒粟米又得,燒羊架更是香氣陣陣。還有一樣極品,無錯就係燒鵝肝,噢賣葛~ 教人怎能抗拒呀?!
 
 金光閃閃
咸食係咪好正呢? 查實,甜品更是呢度既強項。或者講下朱古力噴泉,單是這個金光閃閃的噴泉,盡顯霸氣。
 
一流!
香甜鬆化的馬卡龍,各種口味都有好吃,星級水準;貝殼小蛋糕,鬆化可口;仲有香甜的朱古力。
 
超好吃
千祈唔好走漏蛋糕環節,層次十足的Opera,濃郁的朱古力撻,人見人愛的芝士流心蛋糕,好食到唔識得形容,自己來試下吧!
 
仲有炒雪糕
呢度既炒雪糕,同埋雪葩,我只能說,是頂級。所以,即使此時已是十二成飽,也得要吞下幾球,才肯收手。
 
要消滯
最後,以咖啡/茶去作總結。


我會說,這裡應該是香港數一數二多嘢食的自助餐,甜品質素尤其高,趁早來吧!


餐廳資料:
自助山
灣仔皇后大道東183號合和中心62樓
2506 0888/ 2506 0666

7 則留言: