木子居酒屋 - 輕鬆嘆

相約三五朋友晚飯相聚，最好找個唔使限時限刻還枱，可以慢慢食，能夠邊傾邊飲的地方。

居酒屋大概是不錯的選擇，腦海忽然浮起MM曾介紹過，在大圍的親民居酒屋，Kiko Izakaya。

特高的樓底，木系作主調，柔和之燈光，是典型的居酒屋格局，肯定合我們要求了。

來這類地方，當然先要飲嘢，啤酒或者Sake當然是最正路之選擇，不愛酒精的朋友，亦可揀檸檬綠茶、青桔梳打等等，總有岩飲的東西。

一輪佐酒小吃，鮟鱇魚肝勝在細滑豐腴的口感，漬牛蒡爽脆咸香，螢光魷魚鮮甜清脆又爆羔，梅漬番茄醒胃又消暑，在炎炎天氣品嚐，最為合時。

清酒煮蜆是非常驚喜的一道，蜆肉隻隻飽滿，鮮甜到不得了，亦完全無沙。

這裡的刺身也很新鮮，個人最愛深海池魚，肉質細致爽脆。另外的磯煮鮑魚，上桌時已切成一片片，更入味及方便食用。

土佐豆腐，經炸過的豆腐口感有層次，帶醬油香氣，夾著一堆的紫菜絲同吃，不錯吃。

再來是幾款的串燒，全部是即叫即燒，成品香氣四溢，阿波尾雞皮這邪惡的東西，無可能會唔好食。荔枝豚肉卷亦有夠清新，免治雞肉棒一定要沾生蛋兼同吃，才更滑更好味。

本人從來是明太子的忠粉，所以這明太子芝士蛋卷，軟滑又滿帶咸香，這款必須要趁熱食，保持最細嫩的口感與味道。

有我在，也必定會有日式餃子。體型偏細，但個冰花底做得好靚，加上微微焦香的餃子底部，沒有投訴了。

大家慢慢傾，慢慢飲，慢慢食，開心有時真係可以好簡單。

餐廳資料:
木子居酒屋
大圍積富街33號積康樓地下E-G號舖
26222881