海外篇：芳林巴剎與熟食中心 - 美食雲集地

食物：$$$$
環境：$$$1/2
服務：$$$$

到過新加坡旅遊的朋友，應該對芳林巴剎唔會陌生，佢係星洲其中一個十分有名的熟食中心，規模唔細的。

在巴剎兜個圈，你就知道這是卧虎藏龍之地，食物選擇非常豐富，而且不少是獲得車軚人的青睞。

來到這裡，選擇困難症必定發作，只會希望自己能像牛一樣，可有四個胃。

結霜橋三輪車喇沙 (有分店在Jalan Berseh那邊)，是筆者的重點推介，若在全場只能挑一款東西，我會毫不猶疑走到這檔。

我覺得呢度既喇沙，贏在兩個地方：湯底和螄蚶！

湯頭不很辣，有椰香，好有層次，是會令人喝得一滴不剩的。另外，正是螄蚶，大粒又鮮味到痴線，令成碗喇沙生色不少。食家蔡瀾先生曾講過，喇沙是要有螄蚶。雖則時代唔同左，星馬很多地方的喇沙已不再附有螄蚶，然而你食過就會知道，真係完全兩回事。其餘的配料，豆卜、魚片等索味嘢，有出色湯頭的扶持，自會變得吸引。

除左喇沙，巴剎內的其他美食，在我而言都是叮噹馬頭，今次就食左阿王咖喱麵。

店子只賣咖喱雞粉/麵，唯一可選是要米粉定係黃麵，店主將大大殼咖喱雞放入麵內，成事。

相比起剛才的喇沙，呢碗的辣度是較強勁，也香，但層次唔多。除左幾件雞肉，仲有豆卜、薯仔等，如果你喜歡吃咖喱既話，都是吃得過的。

個人習慣，吃什麼也好，都是要飲嘢的，所以又買左杯蔗水，呢個場既價錢，在星洲而言係好親民的。

其他的檔口，如基記雲吞麵、歐南園炒粿條、東陵酥皮咖喱角等，我以前都試過，均是值得一嚐的。

巴剎資料:
芳林巴剎與熟食中心
531A  Upper Cross Street, Singapore