2023年4月5日 星期三

帝京軒 - 大玩順德菜



食物:$$$$
環境:$$$$
服務:$$$$ 

認識我既朋友,大概會知道我是帝京之常客,每隔一、兩個月都會到訪酒店的不同Outlet。

週五收左工,又約埋大家去中菜廳帝京軒,品嚐佢新既餐單。

今期,大玩順德菜~

一開波的頭盤,分別有陳皮墨魚餅、手絲雞陳村粉,以及京蔥爆遼參。遼參軟腍入味,口感唔錯,記住要連埋京蔥同吃,那馥郁的蔥香,令遼參更迷人。素來喜歡吃雞絲粉皮,將之換成陳村粉,沾些足量之麻醬,一樣掂!

墨魚餅口感彈牙,還有絲絲陳皮香,用料十足,絕無欺場。

順德的魚雲羹出晒名,生拆魚雲就是相當花時間的工序,畢竟細骨實在多。生拆後配以濃郁的魚湯,再混入勝瓜絲、木耳絲及鮮竹絲等等的材料,當然仲有花膠,各款材料切得細緻,湯頭熱度夠,喝得舒服。

大良炒鮮奶是順德另一名菜,來到酒店,用料自然更矜貴。師傅採用了北海道3.6牛奶,加入鮮銀杏、蜜豆、金華火腿蓉及欖仁等,面頭再整隻大蝦,炒出來更為香滑及有層次,我連底下的脆盞也吃清光。

很愛吃筍殼,平時多半是吃油浸,但今次師傅將之起肉去骨,再以豆豉及蒜子去燒焗,魚球咬落啖啖肉,又香口,吃得滋味。

污糟雞以銅盤盛載,保留原始風味。雞肉是毫無疑問的入晒味,肉嫩多汁,妙在加入了爽脆之豬肚,層次感更為豐富。

蒸籠上桌,眼見薑絲及大頭菜也蓋不住特大的蝦乾,好鬼誇張。然而煙韌咸香的蝦乾還不是主角,墊底的鮮肉眼筋才是極品,其爽脆口感,跟咸鮮的大頭菜配合的天衣無縫,識食的朋友即時要碗白飯來伴之。

生菜包吃得多,但今次的餡料除左豬肉碎、松子及菇粒等,仲加入左鮮蜆肉,同埋甜梅菜,增添順德原素,出來的效果肯定好。

套餐一定會有菜喇,簡單的蟲草花鮮竹小耳浸絲瓜,清清地但不失美味,我唔係下下都要食啫啫唐生菜咁重口味既。

單尾的麵條也絕不敷衍,是五層腩撈淮山麵。健康爽口的淮山麵混入左豬油,再咬一口皮脆肉咸香之燒腩,難為正邪定分界。

甜品並不難猜,就係粟蓉西米焗布甸,很好吃,若然面頭再焗燶一點,仲岩心水。

一直感覺順德菜係比較平民,但大廚之演繹,將順德菜登上了大雅之堂,讚!


餐廳資料:
帝京軒
旺角太子道西193號帝京酒店3樓
26226161

2 則留言: