2023年1月25日 星期三

Main St. Deli - 大大啖



食物:$$$1/2
環境:$$$$
服務:$$$$ 

臨時臨急同老豆去搵食,想食餐好既都唔容易。老豆中意食蛋糕,諗諗下不如同佢去Main St. Deli 食超巨型既紐約芝士餅。

呢類既美式餐廳,的確比較易有位,甚至Walk in都可以,那怕是中午繁忙時段。

甫坐低,店員奉來的酸椰菜及酸瓜,作為餐前小食打開胃口,抑或係食到中段要來解膩,都是非常有用。尤其是食肉食到飽飽滯滯,來些少酸菜,實在是無比受用。

原本來這類餐廳,理應食漢堡,不過老爸依家唔食牛,就要隻熱狗取代之。紐約式既熱狗,一條法蘭克福腸,加啲酸菜和黃芥末,簡單到一個點。這種配搭,論味道總唔會驚為天人,但就從來是最恰當既Comfort Food。配埋剛炸起的薯條,沒咩好投訴。

Spare Ribs份量好鬼大,仲跟埋勁多的薯角,美式餐廳的份量就是如斯誇張。上桌時陣陣的煙燻香氣,用刀切落去就知道,肉質鬆化易離骨,近邊邊的位置也不會硬,結合甜甜的汁醬吃,好惹味好好食。但由於份量真係大,我哋又要留肚食巨型芝士蛋糕,唯有打包部分回家當晚餐。返到屋企加翻熱,都一樣咁鬆化美味。

呢件又高又大件到無倫既New York Cheesecake,一向是店家既經典。實淨又香濃既出品,很好吃,卻也超級的漏,我吃一小半便已投降,餘下的大半件就交俾愛吃蛋糕既老豆去清碟。

飲埋杯彩虹雲尼拿奶昔,點會唔飽到上心口呀!

食美式嘢,就是如此滿足~


餐廳資料:
Main St. Deli

21327898

沒有留言:

張貼留言