2022年11月14日 星期一

Lighthouse Cafe - 週三的特強海鮮任食



食物:$$$1/2
環境:$$$$
服務:$$$$ 

之前同大家分享過海洋公園Fullerton Hotel的中菜廳 – 玉,今次就介紹酒店既另一outlet,食自助餐既Lighthouse Cafe。

星期一、二、四價錢$688,星期三、五六日則是$788。雖然星期一到星期七都有自助餐供應,不過我建議大家星期三晚去食。點解咁講呢? 因為逢星期三會有加強版既海鮮陣容,而且唔似星期五、六、日咁要分兩段時間,可以由6點一直食到9:30。

嘢食好豐富,要逐樣講真係有排講,所以只會重點介紹下啲必食既項目,同埋我自己既推介。

正如剛才所講,逢週三既海鮮選擇特別豐富,單係凍海鮮呢邊,就有龍蝦、小龍蝦、花蟹、凍蝦及翡翠螺等等。龍蝦肉質嫩滑,唔會好似咬擦字膠咁。花蟹好鮮甜,凍蝦爽口。小龍蝦我就無乜興趣,據聞都可以。

跟住有大阪燒同埋瀨尿蝦,如果你淨係想食瀨尿蝦既話,同師傅講,佢都可以安排既。瀨尿蝦既肉質都係非常之鮮甜可口。

日式美食,壽司刺身當然不缺,另仲有不同款式既手卷,魷魚、海老天婦羅等,不過我最中意既,係檸汁醃油甘魚,醒胃好吃。

攞左盅燉湯番嚟同朋友分享。星期三既燉湯都會係升級版本,鮑魚花膠。湯頭幾清甜,花膠當然唔會話勁大勁厚,但以自助餐水準而言,交足功課。

繼續講中式嘢食,龍蝦伊麵、海鮮炒飯同埋避風塘炒蝦等,貫徹海鮮主題。另外我早已瞄準左片皮鴨,要把握時機去拎,個麼麼皮要熱辣辣才好食。

呢度既總廚係來自意大利,所以都設有一個意大利美食專區,各款意式食品自然亦做得對辦,譬如話risotto幾清新,自家製Pasta口感唔錯,瑪格麗特薄餅充滿拿波里風情。

整幾片芝士後,就要向甜品進發。

甜品方面,提拉米蘇濕潤有酒香,朋友就話一定要試木桶豆腐花。而作為來自星洲的酒店品牌,自然有唔錯既當地特色甜點,如香甜的斑蘭千層糕。最最最推介既係斑蘭蛋糕,斑蘭香氣撲鼻而來,質感軟熟到一個點,即使再飽,一件都絕對唔會夠喉。

曲奇餅係自家製,尤其中意抹茶口味。食幾件曲奇,飲杯咖啡或者荔枝茶作結尾,大滿足!


餐廳資料:
Lighthouse Cafe
黃竹坑海洋徑3號香港富麗敦海洋公園酒店1樓
21667466

2 則留言: