2022年11月16日 星期三

南華軒 - 昔日的味道



食物:$$$$
環境:$$$$
服務:$$$$ 

事隔三年,大家終於可以坐埋一齊食飯,實在感恩。人多吃中菜就最合適,對嗎?

是次目標,位於衛理徑的南華軒,我從未光顧過。聽聞都幾吊腳的,所以約埋幾位一齊飛的過來。

難得大家重聚,要吃就吃特別些的,懷舊菜色是也,勞煩搞手預先夾好菜單。我就功課也省得做,菜單亦沒預先看,到時餸來張口便是。

打頭陣的蜆蚧鯪魚球,大大粒漲卜卜。鯪魚球本身好吃之餘,那碟蜆蚧才是重點,端上桌時已香氣四射,蜆肉飽滿,不死咸,令鯪魚球生色不少。

店員拿來一大盅湯,係雪梨川貝海底椰燉。打開盅蓋,撲鼻而來的香氣,再看店員盛出來的滿滿湯料,已說明一切。毫無疑問是勁甜美,一氣呵成,喝得一滴不剩。

忘了多少年沒嚐過八寶鴨,這味菜色人少真的無辦法食到。呢度用上體型較小的番鴨,餡料以薏米取締糯米,吃起來無咁頂肚,但依然美味,記得一定要連皮吃才是皇道。

另一味是我喜歡的油浸筍殼,每次去星洲都會食。在香港而言,這尾魚御寶軒做得好,同時亦貴到痴筋,想不到朋友會安排於此局出現,開心到跳起。微微脆口而肉質保持細嫩,甘香惹味,不失禮。

這兒的中式牛柳,並不是橙橙黃黃既醬汁,而是喼汁味偏重的兒時味道,有番咁上下年紀既朋友大概會知我講乜。

中意唐生菜既爽脆,頂頭加埋調過味的蒜粒,重口味的朋友一定欣賞,那怕吃完之後『呵氣如蘭』。

單尾的腊味炒飯,米飯是炒得乾身又粒粒分明,料頭細緻,顏色配搭理想,色香味俱全。簡單一個炒飯,盡顯師傅功架。

甜的是圓肉薑茶湯丸,薑茶夠晒辣,黑芝麻湯丸以豬油炒餡,那有不好吃的可能。

呢度仲好在有供應咖啡奶茶,甚至乎日本抹茶。吃得飽飽的再來杯拿鐵,好圓滿~

大家食得盡興,已經諗定下一局既目標,為食呢家嘢真係改不了的。


餐廳資料:
南華軒
油麻地衞理徑6號南華會網球部地舖
93808187

2 則留言: