2022年11月30日 星期三

Grand Majestic Sichuan - 不一樣的川菜體驗



食物:$$$$
環境:$$$$
服務:$$$$ 

好歹都在唔同既川菜館子打滾左咁多年,對坊間的川菜總也會多點留意,當知道Black Sheep Restaurant呢個鬼佬集團開佢哋首間川菜廳既時候,我已經蠢蠢欲動。

以紅黑作主調,大理石與絲絨材質互相配搭,好鬼靚。據說靈感來自60年代的麗宮酒樓夜總會,只怪我太年輕,對當年的麗宮是毫無頭緒。

主廚Theign Phan與川菜學者Fuchsia Dunlop合作設計既菜單,能否做到一菜一格,百菜百味的精髓?

一開波先來幾款涼菜,涼拌萵筍絲爽脆,蒜蓉拍青瓜亦然,而且蒜香惹味。棒棒雞肉質嫩滑,辣中滲出微甜,好吃。

夫妻肺片紅油味型對辦,這裡只用上牛脷與牛𦟌,薄薄的切片帶出不同口感,麻辣鮮香。配上精緻餐具,本身地道的四川街頭小吃,登上了大雅之堂。

涼菜之後,就來重慶辣子雞。雞粒比傳統的稍大一些,炸得酥脆,愈食愈過癮。

酸菜魚的湯色偏黃,酸中帶出很輕微的辣勁,好醒胃。市面大多數以桂花魚來做此品,這兒則採用了石斑,效果也不錯。

麻婆豆腐是最好下飯的一味,呢度仲用埋草飼牛做肉碎,更加正。雖然是晚有好多好多菜色,不過點都要叫番個飯,大家些牙。

陳皮牛肉同樣是草飼牛,用上牛柳,肉質自然嫩滑,加上淡淡陳皮香,辣度點到即止,食唔到辣既朋友都可以一嚐。

呢度既糖醋裏脊有別於粵菜既咕嚕肉,並不是用上橙橙黃黃既汁醬,而係以黑糖與及黑醋作調味,那種酸甜是截然不同的風格。相比之下,我更欣賞這道出品,或者是平常更少機會嚐到的緣故吧!

跟住嚟兩個菜,乾煸四季豆煸得唔算勁乾身,令四季豆保持爽脆口感,結合黑毛豬打造而成既肉碎,又係很好送飯。

一向喜歡吃津白,呢個雞油津白好香好入味,面頭既幾粒紅椒其實只係點綴,並沒有熗炒既做法咁刺激。

單尾係擔擔麵,這裡的是乾撈做法,在香港會比較罕見。辣度並不強,反而幾重麻醬既香氣,我仲好中意佢麵質夠爽口,再飽都可以清晒一整碗。

用豆漿來做的布丁,靈感來自Panna Cotta。質感是細滑,豆香是有,但可以更濃郁,特別喜歡佢加入左黑芝麻,盡收畫龍點睛之效。

另一款就係傳統的四川冰粉,滑溜又有桂花糖既清甜,簡簡單單放點士多啤梨及藍莓等作點綴,好睇又好食。


餐廳資料:
Grand Majestic Sichuan
中環遮打道16-18號歷山大廈3樓301號舖
21511299


5 則留言: