2022年10月27日 星期四

心烤大眾酒場 - 輕輕鬆鬆鄧梓峰



食物:$$$$
環境:$$$$
服務:$$$$ 

週五臨收工,舊同事忽然約食飯吹水。吃飯當然不是問題,臨時臨急要搵間有位又有質素既食店,才是困難事。

有想過從大圍開出來的好湯好麵,不過舊同事話已經食過,唔想短期內又再重臨。

邊行邊諗,走到駱克道,醒起一個地方,氣氛輕鬆又方便傾計,嘢食仲唔錯,就係心烤大眾酒場。

Highball唔記得影相,咁就直接介紹下食物。南蠻雞咬落鬆脆,肉質嫩滑又Juicy,配埋醒胃既蛋黃南蠻醬,保持水準。

一向喜愛吃牛脷,而呢度既牛舌超大串,每次來也必定要吃。口感爽脆彈牙,醮上自家調制既芥末,絕對滿足。

舊同事話想睇我表演食雞尾,我才不怕。軟腍中又帶點彈力,吃起來充滿脂香,佐酒一流,唔明朋友覺得有乜咁可怕。

雞心雞腎的爽脆口感,又是討喜,吃串燒真的要有點酒精才行。

最後的燒飯糰,微微帶脆既外表,軟熟之內涵,恰到好處的調味,吃得同事津津有味。連埋旁邊的高菜漬同吃,是我prefer的吃法。

仲以為有需要加單,不過細食既我哋,吞下整個飯糰之後,已再沒有任何戰鬥力了。


餐廳資料:
心烤大眾酒場
銅鑼灣駱克道487號駱克駅21樓
23808000



4 則留言: