2022年10月17日 星期一

玉 - 心曠神怡



食物:$$$1/2
環境:$$$$
服務:$$$$ 

等到頸都長埋,海洋公園Fullerton Hotel終於落成,雖然無話第一時間仆緊去Staycation,但我都來飲左餐茶。

唔記得何時開始,食叉燒係飲茶既指定動作,今次都無例外。叉燒入口鬆化,味道唔錯,如果可多些少燶邊,會更理想。

蜜汁脆鱔皮脆肉嫩,口感帶點點彈牙,溫度足,香口好食。

跟住是一系列的點心,鮑魚雞粒酥,曲奇撻皮鬆脆,鮑魚大隻,但質感保持軟腍,墊底既雞粒索盡精華,自然好食。不過佢就唔夠龍景軒咁細心,無將鮑魚切開,食既時候確係無咁方便。

叉燒包係為小朋友而設既項目,見佢連吞兩隻,應該差極有個譜。

蝦餃形狀幾靚仔,晶瑩剔透,餡料全是蝦,夠爽口,不過食古不化既我,始終中意有豬肉既出品。

假假地都係新加坡品牌,食物點都要加入少少星洲原素既。肉骨茶小籠包是招牌之一。賣相係合格既,收口位做得好,湯汁是夠,不過藥材味實在太強,完全搶去肉餡既味道,我想個湯汁需要調節一下。

再來既龍帶玉梨香,係大粒版本。味道同層次都可以,但我覺得可以再爽身一些。反而旁邊的兩粒漬番茄,超級好食。

豉油雞又係做得好好,雞皮爽,雞肉嫩,而且好入味,連墊底既洋蔥都身價提升。

叫左幾款甜品,大家開心些牙。燕窩蛋撻個撻皮有待改善。楊皮甘露勝在夠冰凍足料,蠻清新的,據聞西米焗布甸都可以,但我實在太飽,沒有品嚐。

食完同小朋友周圍影下相,已是假日的很好節目。


餐廳資料:

黃竹坑海洋徑3號香港富麗敦海洋公園酒店2樓
21667488



4 則留言: