2022年9月8日 星期四

甘棠燒鵝 - 打波食飯直落



食物:$$$1/2
環境:$$$1/2
服務:$$$1/2 

朋友今秋就會離港開展新生活,佢話想去食甘棠,我梗係2仔底死跟啦!

甘棠燒鵝,聽個名或者大概估到,佢同鏞記既後人,係有啲關係。不過其實係咩人開都好,我最關心既,只係嘢食掂唔掂。

有當年鏞記的燒味師傅坐陣,是否信心保證?

呢度有兩款叉燒,忘了訂甘一刀叉燒,即場叫又售罄,唯有改吃西班牙豚肉叉燒。切得較薄身,入口鬆化,唔係差既,咁當然唔夠又厚又肥又燶邊既甘一刀吸引喇~ 所以大家嚟食飯既話,記得要預訂啦!

沒有鵝紅,亦無鵝肝,即係唔使諗一品鵝。既然如此,就要燒鵝算了。肉質唔韌既,皮脆,但就少了一份炭火香。

椒鹽九肚魚反而比想像中出色,鬆脆唔油,內裡細滑,入口仍是熱燙,惹味,岩晒中意香口嘢既我。

南乳粗齋也是我喜愛的菜式,呢度都做得可以,如果可以用煲上,同埋南乳香再強一點,就更合我心水。

薑汁芥蘭去左皮,咬落爽脆,唔怕硬轟轟,都幾清甜,表現稱職。

仲諗住搵地方出去食啲甜嘢,原來有糖水送,味道仲要唔錯,咁就索性坐到夠傾到飽為止,反正佢都無下一轉。

仲有幾多次機會見面呢?


餐廳資料:
甘棠燒鵝
銅鑼灣加路連山道88號南華體育會1樓
35802938



4 則留言: