2022年5月26日 星期四

安南 - 越式風情



食物:$$$$
環境:$$$$
服務:$$$1/2 

香港地中高價既越南餐廳似乎唔太多,除左帝苑酒店之外,我最深印象就是安南。

是日,係兩個人唔太肚餓既狀況下,只係食左好少嘢。

要左個越式酸子大蝦。酸子大家可能唔知係乜,其實即係羅望子,佢既酸味幾獨特。坊間有唔少地方會將酸子汁做成甜甜酸酸,不過呢度就以咸酸為主,同樣醒胃,唔錯既。用上虎蝦,個子夠大,蝦頭稱唔上十分多羔,以食蝦肉為主。勝在肉質爽彈,唔會霉,結合酸子汁係好食既,煮到透晒吸晒味既洋蔥都係好東西。

另外叫左蝦肉扎肉炒飯,好多既蝦肉、扎肉、蛋,仲有蔥花、紫洋蔥同埋少少芫茜,非常足料,最緊要係夠熱,吃起來香口,好耐無食過咁有質素既炒飯了。

食過好幾次安南,佢既椰青蟹係最好食既,不過今日戰鬥力太弱,真係食唔落,唯有食些少甜品就算。西米斑蘭糕,賣相平實,至少色水唔係得人驚既青BB。好有斑蘭既香氣,甜度適中,質感煙韌但唔黏牙,與我手中既滴漏咖啡,十分匹配。

椰汁紅豆冰就睇色水都知椰汁夠晒,仲有唔少紅豆,據聞好正。

我就堅持飲杯越南滴漏咖啡。香濃,煉奶係底,飲落係好地道嗰個味道。呷一口咖啡,食一啖西米斑蘭糕,好高既享受呀!


餐廳資料:
安南
九龍塘達之路80號又一城L1層20號舖
28662803


5 則留言: