2022年4月7日 星期四

Musubi Hiro - 嘆個特色Brunch



食物:$$$1/2
環境:$$$1/2
服務:$$$$ 

星期日,最佳既節目莫過於係食Brunch,對嗎?

不過我今次唔係去酒店,而係去中環一間以日式居酒屋為主題既酒吧餐廳試下,幾有趣咁。

佢既三道菜Brunch索價$268,咪睇佢以為好少嘢唔夠食,其實份量好大,我哋最終係抱住個肚走呀~

$198可以Free Flow 紅白酒、啤酒、香檳、清酒、CocktailMocktail等等,近排困左咁耐,難得出街食嘢,就飲啲Sake!

頭盤之一,係牛油果吞拿魚沙律,足足半個牛油果切片,靚靚仔仔鋪係吞拿魚沙律之上,沙律大到嚇親。牛油果既生熟程度恰好,個人最喜歡柚子既醬汁,伴沙律好開胃可口。

另一款頭盤,係炸既大餃子,請店員幫忙切開兩邊,大家分吃。

咬落香脆,唔會硬轟轟,餡料係日式叉燒,幾好味。喜歡既話,可沾點阿根廷青醬,但我認為食佢既原汁原味會更好。

朋友見到有鰻魚,隨即雙眼發光。師傅將原條鰻魚用火槍燒香,吃起來更香口。鰻魚本身唔算太肥美,但汁醬調校得好,唔太甜,亦沒半點腥。底下的玉子燒,總算嫩滑。牛角包賣相好似無乜生氣,估唔到食落又幾香。

飯糰塔既份量真係唔講得笑,睇見師傅在準備時,我同朋友已經嘩嘩聲。午餐肉御結好有夏威夷風,味道唔會死咸,質感幾好,如果紫菜可以再脆口啲就更正。另一件其實都係午餐肉餡,不過經炸過,又唔同食法。

甜品係一件蜂蜜蛋糕,香甜軟熟,頂頭唧既忌廉唔太甜,配埋微酸既藍莓,簡單而美味。

呢一餐,幾特別~


餐廳資料:
Musubi Hiro
中環閣麟街37號地下
55976911


4 則留言: