悅 - 手工菜之夜

食物：$$$$
環境：$$$$
服務：$$$$ 

同饞嘴朋友傾開，驚覺已經好耐無食懷舊手功菜色，趁十二月呢個奉旨放肆既日子，與新知舊雨，大擦番餐。

食懷舊菜又唔一定要去歷史悠久的老菜館既，如是夜，一眾便來了位處銅鑼灣、新開業的悅。

總廚歐陽師傅掌廚逾四十年，當中在福臨門廿年，基本功肯定扎實，來這裡食手功菜，我絕對有期待。

食手功菜，自然有些菜色是需要預訂，所以提早寫好菜單，就萬無一失。

先來幾款頭盤，素脆鳝不是第一次吃，將冬菇切絲、上粉再油炸，配上甜甜酸酸的汁醬，無論味道與口感，均與真 · 脆鳝十分相似，此品重點在於要回鑊再炸第二次，才能做到鬆脆的口感。頭抽煎日本淮山，端上桌時香氣撲鼻，感覺很像煎蘿蔔糕，當然吃時那爽脆的口感，又是另一回事，很讚！

鴨血本身已是邪惡之物，披上黃金聖衣，變成金沙鴨紅後，更加是令人停不了口的邪惡軸心。

話明是吃懷舊手功菜，湯品也絕對有睇頭，大家預訂了碩果僅存的豬肚鳳吞燕。

是的，傳統好多時會用翅，但今時今日許多朋友已經唔食翅，師傅因而採用燕窩取代之。

簡單來說，就是豬肚包雞包燕窩，比起麥兜的雞包紙包紙包雞包雞包紙，勺鑽萬倍。無須長氣，大家可想像到有幾考功夫和心機時間。看侍者將大大隻『豬肚』撈起，再小心剪開，豬肚之下的雞皮完好，還有份量十足的燕窩，令人垂涎。呷一口湯，甜到無朋友，好正斗。席上有人不嗜豬，改以蟹肉官燕蒸乳酪，同樣精彩。

鮑汁蝦籽柚皮，又是花功夫又相對賣不起價的東西，是晚的出品很好，柚皮沒半點苦澀。

接著來的脆皮蔥油雞，又係不得之了。歐陽師傅做的炸子雞，皮脆得誇張，肉質嫩滑，毫無疑問是頂級水準。重點還在於兩款蔥油，即青蔥油及乾蔥油，佐以脆皮雞吃，相當驚艷。有朋友更將蔥油打包回家，撈飯撈飯一流。

高級地方食咕嚕肉，用上黑毛豬早已不是新鮮事。這兒除了嚴選西班牙黑毛豬外，更以黑蒜來取締菠蘿，避免生果釋出水份而令醬汁變稀，可見師傅雖然半廚多年，仍會不斷鑽研，務求進步的專業精神。這味咕嚕肉，外脆內鬆化，採用意大利陳醋，醒胃不過酸，結果大家連旁邊的黑蒜及無花果，也吃得一粒不剩。師傅就細心地以Impossible Meat做出一味素版本，讓不吃豬的朋友都可以品嚐此等味道。

個人很喜歡吃筍殼，不過今時今日許多地方的油浸筍殼，都是炸得硬轟轟無肉食，當然呢度既出品就好出色，鬆脆而肉質鮮嫩，是我全晚最欣賞的菜色之一。

濃湯千絲大根，一絲絲的日本蘿蔔爽甜入味，以少許金華火腿絲作點綴，更加香更加矜貴。

再喝一碗鮮美的魚湯腐皮浸葛絲，好舒服。

單尾的炒飯也不是普通貨色，而係砂鍋蟹粉炒飯，每一口飯都帶著蟹粉的鮮香，即使已是十二成飽，也可吞下整碗炒飯。

甜品環節，兩味預先訂好的精緻甜點為椰汁馬蹄卷，以及時果雪梅娘。

前者真的很少機會嚐到，清新怡人。家陣雖不是芒果的盛產期，不過大家嚐到的芒果雪梅娘，又好甜美可口。

由於嘢食實在太精彩，大家都好想追加木桶豆腐花，作為是夜的完美終結。

好耐都無試過咁滿足~

餐廳資料:
悅
銅鑼灣勿地臣街1號時代廣場13樓1301號舖
28383968