2021年10月20日 星期三

Cafe, Hyatt Regency TST - 又有藉口食食食~



食物:$$$
環境:$$$$
服務:$$$$ 

阿妹生日,又有藉口食餐好的囉~

主角建議食自助餐,小朋友都可以出去揀嘢食,開心好多。大家當然無問題,講到底,食係其次,旨在見下個小主角啫。

印象中,尖沙咀凱悅的自助餐,夜晚試過好多次,中午卻從來沒有,從來都沒有...

晚上來,會專攻活龍蝦,所以或會放棄其他環節,譬如說壽司刺身。然而中午是沒有龍蝦任食,那麼,我又有空間可以品嚐。個人認為,刺身比壽司出色,三文魚及吞拿魚都是厚切,材料新鮮,壽司則弱在飯糰之上。

沙律循例式嚐一點就好,因為我的胃納,要留給風乾火腿,與及各式芝士。

凍海鮮有蟹,卻不是外邊間間都供應的長腳蟹,有性格。當然,基本的如凍蝦,或者青口等,還是齊全的。

熱葷種類唔算多,中式的最特別是弄來川味水煮魚,還很罕見地用上龍脷柳。西式的烤薄餅,加入了印度原素,造成天多利雞薄餅。日韓式項目,較吸引的分別有一大鍋的關東煮,與及牛筋骨。

唔知大家有無發現,去到邊間酒店食自助餐,總不會沒有印度的食物,烤雞也好,咖喱也好,即使不是非常受大眾歡迎,卻一定保留著的。

燒味屬實而不華的一欄,叉燒偏瘦,但肉質鬆化。燒肉賣相未算好誘人,卻又至少做到皮脆肉不嚡口。

雖則我係不折不扣既食肉獸,但係燒豬腩卷或燒和牛前腿,都不是我最主攻的,皆因我更有興趣吃燒菠蘿。

甜品環節,蛋糕款式十分多,除了大路的口味以外,甚至出現重口味的榴槤蛋糕。另外,仲有偏中式的,如楊枝甘露,同埋木桶豆腐花。

食得飽飽,餐飲放棄了香濃的咖啡,來一壺伯爵茶消下滯,也是好選擇。


餐廳資料:
Cafe, Hyatt Regency TST
尖沙咀河內道18號香港尖沙咀凱悅酒店大堂樓層
37217700

4 則留言: