2021年4月12日 星期一

津津茶餐廳 - 老店雞味



食物:$$$1/2
環境:$$$1/2
服務:$$$1/2 

鰂魚涌地鐵站附近,大酒店對面,有間老舊的茶記,叫做津津茶餐廳,大大話話有十五、六年歷史。

這兒食物選擇唔算少,但名物只有一款,就係鹽焗雞,好有一曲走天涯既味道。

好日唔會過來呢頭,所以甚少光顧這裡。翻睇紀錄,對上一次來,已是八年前的事。身處今時今日既香港,你千祈咪同我講係快活不知時日過。

畢竟多年沒來,對其鹽焗雞的水準已印象模糊,是日難得有機會重溫其味道。

環境十年如一日,紅底白字的古老餐牌掛滿在牆上。週六下午兩點左右,人客並不多,可以進佔卡座。

茶走先來,用上經典的厚身瓷杯,加左印象分,可惜茶底有點澀,質素未如理想,早知飲碗菜乾豬肺湯仲好。

朋友點的牛腩撈麵,麵條有點點鹼水味,牛腩好嚡口,味道似罐頭,自然滿足唔到我。

算了吧,始終牛腩從不是這裡的強項,焦點放番係鹽焗珍干雞飯之上吧!

雞肉不嚡口,雞皮帶咸香,不用沾沙薑已很夠味,但沙薑仍不是無用武之地,撈飯就好。

最精彩的,始終是雞內臟。勁大堆頭的雞腎與雞肝,前者爽脆,後者粉嫩,懶理什麼超唔超標,食左先講。

若說珍干是喧賓奪主的話,那就繼續由它喧賓奪主吧!


餐廳資料:
津津茶餐廳
北角英皇道774號模範村地下
25648731

4 則留言: