2021年4月9日 星期五

CoHee Studio - 不再隱世的隱世咖啡?!



食物:$$$1/2
環境:$$$$
服務:$$$$ 

好日唔入下錦田,難得是日會去朋友仔度燒嘢食 (唔知幾多年無搞過呢類玩意),幾歹把握機會,中午同埋大家蒲下錦田的咖啡店,做半天偽元朗文叔。

今次來的Cohee Studio,分開左右兩個舖位,原先一邊係咖啡室,另一邊係用作咖啡教學的地方,家陣索性開邊都俾人坐低食嘢。

話雖有兩個舖位,其實座位仍十分有限,加上假日許多愛啡之人慕名而至,好在T兄先去搵位,我們一行八人 (分兩張枱)等十分鐘左右便可入座。

咖啡室不論外形,抑或是內裡裝修,都散發著日系的影子,不其然令筆者想起年半前在福岡的幸福日子。

朋友與我口味相若,喜歡拖鞋包多於貝果,那麼就點上兩款不同口味的拖鞋包好了。其中之一,係三文魚、牛油果,與及忌廉芝士拖鞋包,旁邊還配上大堆頭的黑醋沙律。軟熟的拖鞋包塗上忌廉芝士,再工整地砌上片片牛油果,本已是健康美味的東西,三文魚置頂,令成件事感覺更豐富而已。沙律菜大致新鮮,但黑醋蠻多,味道偏酸,最好夾著牛油果同吃。

另一件係北海道帶子、三文魚籽和炒蛋拖鞋包,賣相也很吸引。雞蛋炒得嫩滑,三文魚籽夠大顆,頂頭放兩粒輕煎過的北海道帶子,那有不好吃的道理? 亮點是混入了洋蔥,又令呢個拖鞋包生色不少。旁邊的沙律菜,並不是配黑醋,而係伴以日式胡麻醬,同樣清爽。

生怕吃不飽,再來一份輕食,巴馬火腿溫泉蛋沙律。份量其實一點也不輕。無問及火腿既月份,但來得軟熟咸香,再加隻溫泉蛋,任由蛋液滲進黑醋沙律之內,大大口連火腿同吃,也不錯。

又來一件蛋糕吧,四個人分吃,其實每人一口而已。朋友挑了焙茶芝士蛋糕,店主配上簡單的點綴,總算是花了心思。焙茶味道不很強烈,感覺是芝味作主導,味道仍可以,脆餅底亦有助加分。

Iced Latte味道是預期之中,Cold Brew味帶酸。

另一朋友既Piccolo擁有漂亮拉花,據知夠晒濃郁,看上去聞起來也是誘人的。

吃飽飽,外面排隊等位的人亦開始多,早點讓位,大家去吉慶圍、錦田紅磚屋走走...


餐廳資料:
CoHee Studio
元朗錦田市街152號地舖

3 則留言: