2020年11月25日 星期三

利佳舫避風塘 - 大愛風味小炒



食物:$$$$
環境:$$$$
服務:$$$$ 

早於森林師傅在餐飲界少林寺工作時期,已嚐過他的手勢,之後有好一段時間唔清楚佢既去向,直至近月經傳媒報導,才知道他己自立門戶,在二坡坊開設了利佳舫避風塘。

四個人的飯局,大家都餓左地道的風味小炒好耐,我便建議來森林師傅那裡,睇下佢自己打骰後,會否有更大的發揮空間。

反正大家唔趕時間,第一輪先叫幾款,食到咁上下才再加餸。打頭陣是黃椒醬炒刀貝,還以為這類地方的賣相會是粗枝大葉,但原來都有擺盤喎!火侯控制得好,爽口又不會韌,帶點點陰濕辣的黃椒醬好醒胃,令刀貝生色不少。曾考慮過放棄刀貝而選惹味的豉椒炒蜆,好彩及時懸崖勒馬。

食友奧尼係咕嚕肉痴,有她在席上自然會有這味,好在呢度既咕嚕肉也有水準。甜酸汁醬平衡得宜,沒有過份地多和杰,咕嚕肉件件爽脆,伴上的是新鮮菠蘿,大家都搶住食,我就連青椒都唔會放過。

柚皮是在家不會吃到的東西,皆因程序非常費時,這兒處理得好,沒有半點苦澀味。雖沒有放蝦籽,但單是鮑汁已餵得夠入味,我是滿意的,起碼比早前在某酒店嚐的好十倍,墊底的白菜仔索盡鮑汁,自會美味。

再來一味豉汁尖椒。或者大家都知道,吃尖椒有如玩俄羅斯輪盤,可以辣到標眼水,也可以是完全不辣,唔食落口都唔會知道真相,好睇彩數。不過,正如食友話齋,家陣辣既尖椒已經愈來愈少,是晚有人好幸運嚐到辣的,而我吃幾粒都只得微甜味。

由於幾味都很好辦,可以放心追加食物。呢個時候既韭菜花肯定靚,味帶清甜,細嫩無渣,的確不錯。

酸湯辣煮花尾躉,大概就是我們平時常吃的酸菜魚。要讚呢度既湯頭做得好,酸中仍保持一定的辣度,兩者平衡恰好,十分開胃。皮爽且肉質彈牙的花尾躉,我一向喜歡。墊在底下的薯粉,大家都唔會錯過。

吃至此時,已飽得八八九九,但見炸蠔餅非常大份且金黃吸引,幾乎每枱都會點上,鄰桌的食客更食到點晒頭,大家決定豁出去來一份。炸漿不太厚,而且鬆脆,蠔肉成份多,加上蔥粒,本身已很美味,沾上魚露,更能將鮮味引出來,最終是將之全部幹掉的。

又啤酒又汽水,配合鑊氣小炒,是近期吃得最盡興的一夜。

飽到食糖水的空間也沒有。


餐廳資料:
利佳舫避風塘
荃灣二陂坊28號地舖
25060828

4 則留言: