2020年11月24日 星期二

帝京軒 - 大閘蟹第二擊



食物:$$$$
環境:$$$$
服務:$$$$

本打算節制些,今年嚐一餐大閘蟹好了,結果卻是一不離二,本年度第二餐大閘蟹宴,定了在帝京軒。

選來帝京的原因好簡單,只因身邊唔少好食之徙嚐過,有口皆碑,在今日唔知聽日事既時勢,還是活在當下好,我豁出去了。

約好了六位,原先當然是坐埋一枱,忽然又要變成兩枱,但也無損大家食靚蟹的心情。

頭盤分別係黑豚叉燒、烤麩以及醉轉彎。皮爽肉厚而滲出幽幽酒香的雞轉彎,清爽怡人;烤麩是我喜歡的滬式冷盤,廚子還加入了雙冬及木耳,以豐富其滋味;叉燒採用黑豚肉,再來過厚切,口感爽彈,配合帶微辣的貴妃椒汁,有新意。

蟹宴肯定會有湯羹,松茸蟹粉燴拉絲雪燕,看得出的足料,我笑說是睇見都飽的出品。滋潤的雪燕,女士們大概會很受落。加入大量的蟹粉後,就連我呢個大男人也吃得滿足。

再來是老虎蝦皇兩食,霸氣十足的虎蝦,師傅將蝦頭炸脆,再以避風塘方法以炸蒜及辣椒炒香,吃起來脆卜卜又惹味,佐酒一流。而爽彈的蝦肉,就以香滑既忌廉汁醬來伴之,然後再配上白松露油,香氣四溢好吸引。

許多時吃大閘蟹都會飲花雕,不過帝京軒往往會有驚世之作,用花雕調製而成的雞尾酒,配上少許玫瑰花瓣作點綴,配大閘蟹同樣合適。只是,這款雞尾酒甜甜的太平易近人,女士們要小心在不知不覺間喝醉。

吃至此時,主角的大閘蟹要登場了。每人兩隻四兩重的蟹公,細心位是店員會先上一隻予大家品嚐,在適當時候才奉上第二隻,保証大家吃到熱呼呼的好東西,值得一讚!

若然你像我這樣笨手笨腳,這兒還會有專人幫你拆蟹,十分貼心的服務。

再講呢兩隻蟹,蠻多羔的,甚至更有白羔,自然甘香可口。慢慢拆開蟹腳,蟹肉亦夠鮮甜,的確出色。

吃罷大閘蟹,相信各位也可猜到,會有蟹粉小籠包。包得幾靚仔,皮薄收口位細,吃起來是勁足料,湯汁充沛,味道好,而且不用沾醋,因為師傅已貼心地放了幾粒醋珠在小籠包之上。除了小籠包,另一邊亦放上了香煎鳳凰糯米雞。剛巧上星期才跟食友說起久違了此品,是晚就馬上嚐到,最好還要是迷你版本,太幸運了吧!煎得香脆,口感煙韌,好吃。

說是豁出去,就真的是拼老命了。蟹餐之外,仲吃了幾味新推出的風味菜。黃酒釀開窩雞,上趟已品嚐過,今次亦保持水準。還有蔥燒海參,口感好,配埋肉末、蒜子及辣椒,惹味非常,合我意。

薑蔥珍寶蠔,蠔身飽滿,微脆而味鮮,一定要夾埋薑與蔥齊放入口。

菜蔬是蟹餐內的項目,平衡一下是有必要的。

套餐的甜點,合桃酥相當鬆化可口,黑糖薑母茶桃膠湯圓,是太美好的終結。

啊!仲有杯勁辣既薑茶,俾大家驅寒。


餐廳資料:
帝京軒
旺角太子道西193號帝京酒店3樓
26226161

4 則留言: