Corner 18 - 外賣，支持下！

禁堂食令使餐飲業界雪上加霜，作為過氣餐飲從業員，眼見一個又一個兄弟嗌救命，又或是已不幸戰死沙場，感受特別深。

可以的話，盡可能叫外賣，幫得幾多得幾多。

近期買外賣，多半是支持小店，或係朋友開設的餐廳，酒店反而比較少，如心銅鑼灣海景酒店，印象中是第一間。

翻閱酒店的外賣餐單，你會發現價錢實在便宜得嚇人。炒粉麵飯餐盒加罐汽水，六十八蚊起；散點菜單全日六折優惠；包頭盤主菜加甜品的套餐，即使是食扒或羊架，兩舊水有找。

是晚叫左兩個套餐，加些少散點，帶回去與家人慢慢嘆。頭盤的巴馬火腿，肥瘦有致，咸香軟熟，與甜美多汁的哈密瓜，從來是天作之合。話時話，以往頗抗拒外賣既筆者 (堂食主義者)，應係係首次帶呢款冷盤回家吃的。

凱撒沙律勝在新鮮，羅馬生菜片片爽脆，仲有麵包粒及芝士碎，最重要是附有靈魂的鯷魚醬，正宗。另外點了龍蝦湯，味道濃郁，還有蠻多的細嫩龍蝦肉在內，有水準。

素來認為這裡的意粉水準不俗，因而主菜選了海鮮意大利麵。雖不是手造，可幸意粉口感仍彈牙，還有帶子、大蝦、青口等海鮮，非常豐富，我無揀錯。

炭燒美國豬扒是相對較遜色的一項，肉質稍嫌嚡口，連骨的部位要好一些，反而墊底的三色椒，我吃了不少。

燒羊架的賣相靚仔，用手拿起枝骨來齒就最好。肉質鬆化，羊羶味適可而止，醮上芥末或是薄荷醬，美味。底下的什菇及薯仔，亦絕不是茄喱啡。

估唔到，跟餐的甜點Tiramisu，外賣之賣相如此美觀，同時做得濕潤可口，我想Encore。

偶爾一餐酒店級的高質外賣，足夠開心一整天。

消費金額滿$300 (折扣後)可杗指定住宅免費送貨，包括柏傲山、景愉居、傲龍軒、龍景花園、飛龍台、僑興大廈、明德樓、柏景臺一及二座、華園、維景台及海景軒...

餐廳資料:

Corner 18

天后英皇道18號如心銅鑼灣海景酒店1樓

3553 2667