滾得棧 - 香港人就是要去滾

食物：$$$$
環境：$$$1/2
服務：$$$$

端午正日，本諗住同兩老打邊邊當做節，可是老豆痛風發作，自動放棄權利，臨時捉左阿姨頂上。

唔知幾時開始，混醬成為了食火鍋的指定動作。滾得棧沒有十多款醬料俾你撈，來來去只得生熟蒜、蔥花及辣椒粒，於我而言已經足夠。最憎搞一大堆醬料，完任嚐不到食材的味道。

湯底選擇蠻多，老媽子對海底椰濃豬骨鍋情有獨鍾。清香的氣味，還有不少豬骨及粟米在內，前者不會嚡烚烚，粟米更是勁甜美。

太耐無打邊爐，一定要狂食牛肉補償番。先來客例牌的牛頸脊，看其雪花分佈，我大可放心，肯定是好東西。起雙飛的切法，口感更好。牛肉真不用滾太久，輕輕拖兩下便可以食用，軟腍的質感令人停不了口，吃得痛快。

海蝦非常新鮮，隻隻猛力在晃動，彷彿在告誡我自己做人都要『俾啲掙扎』。如此生猛的貨色，咬落肉質自然爽彈，蝦頭有羔，好得呀！

四寶丸是手打的，睇賣相是有點期望，但質感與味道卻俾意料之中略遜。

鳝片幾好，肉質脆口，沒半點腥。素來喜歡大啖肉既筆者，其實不太懂得嘬吮魚雲，但見老媽子吃得津津有味的樣子，我想應該是合格的。

由於牛頸脊水準了得，又忍不住再點一份牛柳粒，結果更有驚喜。粒粒皆鬆化，愈嚼愈有肉香，即使淥很長時間也不會變韌，真心推介。

最後來兩個菜，平衡一下。唐生菜及油羅菜，個人會較欣賞前者，我也真清了不少。

好滿足！香港人唔打邊爐係會死的~

餐廳資料:

滾得棧

油麻地砵蘭街39-41號順好樓地下A-B號舖

24161999