食物：$$$$
環境：$$$$
服務：$$$$
收到朋友既短訊，相約吃下午茶，我答應赴會，唯一條件是要幫襯良心食店。
老友也很爽快地找了一家名叫1 Tenth的樓上咖啡室，可惜上到去的時候，重門深鎖，大家只能望洋興嘆。
失望還失望，立馬搵另一間Cafe吧。還幸荔枝角仍有些良心店選擇，包括Little Break等，最終我們揀了OWLS Coffee。
店子面積小小，十個位左右，食物選擇貴精不貴多，我們三人點四入嘢食大家分吃，當然筆者是要有杯咖啡到肚。
先來的熱狗，有別於坊間一般的出品，皆因是用上黑漆漆的竹炭包，同埋粗身而皮脆的法蘭克腸。再加上肉鬆及微辣的汁醬，成件事很醒胃可口。
另一款的明太子雲蛋多士，粉紅色的麵包結合Fluffy的蛋白浮雲，賣相非常漂亮，女士們見到相信會心花怒放。
用刀切開，蛋汁緩緩流出，再次謀殺唔少菲林。紅菜頭麵包查實無咩紅菜頭味，勝在唔會死實，塗上咸香的明太子醬，已很好吃。原以為蛋白會是得個樣，但又唔係完全無味，大概是混入了鹽、黑椒及少許蛋汁的效果，唔錯！
老友點了香蕉榛子朱古力多士，呢個組合又係極之隱陣，包邊微微帶甜已是合格的出品。
鄰桌吃的竹炭及紅菜頭多士粒粒又是十分吸睛，大家忍不住又來一客。呢兩隻顏色疊起，加埋濃郁的朱古力漿，都好難會輸，如何麵包可以烘得再脆口一點，定必更為理想。
看見店家採用的是澳洲咖啡豆，所以即要杯Flat White，水準是合格的。
文宣不是貼滿全店，只是一張半張小貼紙，提醒我們要保持良知。
蠻舒服的地方，食品既擺盤可看得到店員既用心，值得繼續支持。
多士配明太子，又學到野！:)
回覆刪除好好食架
刪除確是值得支持的小店！
回覆刪除同意呀
刪除