住家版豆沙鍋餅

識我既或許都知道，我是鍾情吃滬菜的。從點心到麵食，由冷盤至熱菜，樣樣皆喜歡，當然仲要食埋甜品，感覺才更圓滿。

忽然屎忽痕，不如試下弄上海甜點?

湯丸等大時大節先整吧！高力豆沙我中意食，但製作繁複，退而求其次，動手做個家用版本的豆沙鍋餅?

我整既嘢食，材料一定簡單：中筋麵粉 、雞蛋、豆沙蓉，以及小半碗清水

先將清水慢慢倒入中筋麵粉，同時邊倒邊攪，打至麵粉變細滑無晒粒粒，之後就可以放雞蛋，再拌勻成麵糊，備用。

平底鑊加些少油，把麵糊薄薄的倒進平底鑊內，煎大約半分鐘成餅皮後，放上碟備用。

用餅皮上塗豆沙蓉，我是在街市買現成的豆沙餡，當然你也可自己蒸豆沙蓉，甜度更可自行控制。

將餅皮包裹成長條型，再放入平底鑊內煎香兩邊即成。

入口微脆而帶軟糯，內裡盡是香甜豆沙的甜點，個人是頗喜歡吃的。

小秘訣：

• 出街食既豆沙鍋餅大都是煎好再油炸，自會香口一點，但在家做唔想浪費太多油，我就省卻了油炸這個步驟

• 如果你是大懶人，買現成春卷皮包制同樣可以

• 想口感豐富些，可以加入香蕉片

• 唔中意食紅豆? 弄個棗泥鍋餅也是不錯的選擇啊！