Corner 18 - 主菜也任食的半自助

食物：$$$1/2
環境：$$$1/2
服務：$$$1/2

自助餐吃得多，半自助都食唔少，但像如心銅鑼灣海景酒店的Corner 18既形式，我又真係首次見。

即係點? 除左頭盤及甜品出去任攞之外，主菜也是任點任食，係咪好誇張呢?!

安頓好，便去兜個圈，睇睇有咩食?! 各式沙律菜山蔬，加埋黎麥、粟米粒，以及多汁的車厘茄，作為健康的開始。

再來一些冷盤。莎樂美腸與各式風乾火腿，跟哈密瓜從來是地上最強的組合。個人其實蠻愛吃芝士，軟硬濃淡我都欣然接受。跟手食埋爽甜的紅黃燈籠椒，以及煙三文魚等，便可以向下個項目進發。

我所說的另一個項目，係凍海鮮。廚子會按人頭送上合適的份量，是晚我們六人，便湊成了豐富的海鮮拼盤，十分矚目。海蝦、蜆肉、翡翠螺與青口，當然唔少得最受歡迎既蟹腳，海鮮迷大概會滿足。

剛才講過，主菜都係任食，且有六款選擇之多，豬牛雞魚，意大利飯及意粉皆不缺。炭燒肉眼扒，看那嫩紅的色澤，已告訴了大家火侯控制得宜。喜歡廚子鋪上芝士片及火箭菜，令這道菜式生色不少。

試了一點野菌意大利飯，米飯口感唔錯，加上野菌及芝士的陣陣香氣，比剛才的肉眼更出色。

然而最討我歡心的，要數到這碟肉醬意粉。意粉的質感合我心意，牛肉打造而成的肉醬又香又惹味，是意想不到的水準。

大吃多款水果清新味蕾後，便要攻向甜點。

濕潤既提拉米蘇，軟滑的芒果慕思，香滑之意式奶凍，仲有哈根大師雪糕，為是晚作甜美終結。

港島區，三百幾的半自助 (已包加一)，主菜仲可以任食，想點?

餐廳資料:

Corner 18

天后英皇道18號如心銅鑼灣海景酒店1樓

3553 2667