翡翠拉麵小籠包 - 大優惠

食物：$$$1/2

環境：$$$$

服務：$$$$

飲食業近來有幾慘淡，相信唔使我多講，大家心中有數。餐廳食肆紛紛推出很大力度的優惠來救市，意圖或企圖吸引多些客人來惠顧。翡翠都唔例外，問心係堅抵食。因此，我又來了食晏。

      

食餐飯都擔心會中招，人人成為驚弓之鳥，茶杯以杯蓋蓋著，呢啲基本動作要做足，至少感覺會衛生一點。

先來份冷盤，雞絲粉皮，貪佢清爽醒胃，其實也大致做到要求，只是粉皮有點太厚，如可以薄一些晶瑩一些就好了。

小籠包與生煎包，是每次來翡翠少不了的點心。小籠包外皮不過厚，夾起無一隻會穿，湯汁豐盈，交到貨。店員說現在的生煎包是母子生煎包，聽得我一頭霧水，原來是迷你版本的『拇指』出品。以鐵板上，底部煎至微脆，湯汁亦充沛，但小小的個子始終吃得不夠暢快，做大一點會更岩心水。

嫩雞煨麵，我沒有試，但據說唔錯。不過，論這道麵食，我早已認定滄浪亭是全港首屈一指，無人能及。

最後來個雪菜蝦仁炒飯，米飯炒得乾身，粒粒分明，但味道是偏淡口，要夾著雪菜吃會好些。灑多幾粒鹽花，呢碟炒飯就無得彈。

沒吃甜品了，因為出面間麵包店的流心芝士菠蘿包做緊買一送一，平均每個只是六個半銀錢，幾歹要留肚吃啦！

餐廳資料:
翡翠拉麵小籠包
荃灣大壩街4-30號荃灣廣場3樓337號舖
23638698