2020年2月18日 星期二

嘉麟樓 - 開。年



食物:$$$1/2
環境:$$$$
服務:$$$$

每年諗去邊度食開年飯都好頭痛,今年卻沒有這煩惱,早已鐵定要去嘉麟樓,皆因我仍清楚記得,這酒店曾經幫助過香港人。

或者大家都好想支持/ 懲罰佢,是日店子座無虛席,樓上都坐滿晒,如非及早訂位,恐怕要望門興嘆。
        


大時大節,枱面都放上了醒獅擺設,場面很有氣氛。


忽然一天,叉燒成為了飲茶食飯的指定項目,至少我每次都會叫。嘉麟樓所供應的,係匈牙利髦毛豬叉燒,早在別處已品嚐過髦毛豬這好東西。這兒的出品,同樣精彩。看這碟叉燒,兩邊明顯是不同部位,較深紅色的一邊質感更鬆化,另一邊則多一點肉香,而兩者皆散發出陣陣的燻香,蠻不錯。此外,蜜餞豆亦加入了金箔,可能因為過年要矜貴些。


之後是一系列的點心,碧綠韭菜餃是其中的廚師推介。澄麵皮不太厚,隱約可見蝦肉等餡料,吃起來是爽,然而韭菜香不出,如以推介食品去計,未算很精彩。


個人習慣,飲茶一定要有蝦餃燒賣。呢度既蝦餃一籠有四粒,坊間已愈見稀少 (家陣多數只得三粒),摺紋稱不上很精緻,但總算皮薄,餡料的蝦肉固然是靚貨,還混入了筍尖,可惜欠缺一點點的豬肉。燒賣頂頭放上了薄薄的帶子及一粒羊肚菌,更顯矜貴,味道也似預期。


五星級酒店的腸粉,自然會貴氣一些,如這份鮮蝦腸,是配上了櫻花蝦。腸粉皮薄而滑,蝦肉爽之餘,更喜歡其放入韭皇,味道更好。至於櫻花蝦,放幾粒在面頭點綴而已。


好像不太夠飽,追加碟炒粉麵就好,挑來蟹肉金絲炒米。相當乾身的炒米粉,質感爽口,完全沒油膩的感覺,瑤柱絲以及蟹肉來得慷慨,非常足料。沾少許豆辨醬來撈米粉,正到冇朋友。


再請店員拿個甜品餐牌,揀來幾款甜點,蛋白杏仁茶是生磨,杏味很濃,但稍嫌太杰,大概是新年關係,加送兩粒黑芝麻湯丸,應下節。


栗茸西米焗布甸,即叫即做,需時較長。成品保証夠晒熱,每一口都是濃濃的栗茸香氣,頂頭仲有粒鬆化的栗子,若然布甸面層可有少少燶就完美,但這份出品已經很滿意。

鼠年相信會是重重難關的一年,大家要加油,最緊要身體健康!

餐廳資料:
嘉麟樓

4 則留言: