Osteria - 回氣，鬆一鬆～

食物：$$$1/2

環境：$$$$

服務：$$$1/2

這段日子，香港人特別辛苦，心情特別沉重，但你我他都明這場將會是持久戰，間中需要回一回氣，否則好快被玩謝～

我既充電方法好簡單，來來去去都是吃吃喝喝。吃一頓豐富既午/晚餐，已經可以Power Up。

是晚去Osteria，整碟意粉，咬啖薄餅，啤啤佢，滿足！

    

先飲碗湯，蟹肉湯濃郁得來，辣勁都唔少，我當然是沒問題，但吃不了辣的朋友可能會受不了。不過，要讚佢材料很足，蟹迷定必喜歡。

原來呢期，餐廳推出了以油甘魚為主角的餐單，所以接下來的幾味，也會看見Hamachi的蹤影。Carpaccio放了些水果及食用花作點綴，賣相挺美，吃起來亦顯得清新。

來過不只一次，知道這裡的意大利麵是手造，所以不會錯過。呢款青色，粗身，有少許似刀削麵的意大利麵，印象中我是首次品嚐。煙煙韌韌，質感蠻好的。加入了粒粒的油甘魚及燒燈籠椒作點綴，簡單美味。

將油甘魚變成薄餅的配料，坦白說，我之前從沒試過。魚肉味較淡，車厘茄清新，整件事感覺上來得輕巧。

近排又心思思想吃甜，是晚竟試了兩款甜點。其一是西西里芝士餅，吃起來沒預期中味濃，混入了果脯及朱古力碎等，口感更為豐富。香港人最重視旁邊的一球雪糕/葩，微酸的口味正好平衡芝士餅的飽滯感。

心太軟濃郁，亦做到流心的效果，許多時會以雲尼拿雪糕伴之，呢度卻配一記草莓雪葩，效果依然不俗，至少達到中和既目的。

兩款甜品，暫時性緩和心中的沉重和不快，但維持不了太久。或者，我應該再試多幾款...

餐廳資料:

Osteria

尖沙咀彌敦道50號金域假日酒店閣樓

23151010