2019年3月29日 星期五

Teawood Deluxe - 劍指梳乎厘班戟



食物:$$$1/2
環境:$$$$
服務:$$$1/2

從文廸老師的臉書得知,茶木開了間高級版的餐廳,名字簡單直接,叫Teawood Deluxe

據說,其梳乎厘班戟非常好吃,水準甚至可媲美台灣的Woosa

Woosa在我的心目中,是頂級水平,所以當我聽到這番說話,已決定要擇個日子去會一會佢。

可能有些朋友唔知道,其實這所高級版茶木,係可以訂座的,唔須要排餐死。
    


呢個集團最中意『玩嘢』,又既然走得奢華路線,肉燥飯也不同凡響,皆因是用上西班牙橡果豬來做。無疑,比起本地很多台式餐廳的出品來得更香,加埋半隻溏心蛋,很好下飯。當然,請不要跟台灣的肉燥飯相比。


好怕有些香腸弄得硬轟轟,像考大家牙力。呢個就幾好,至才不太硬,夾著蒜片同吃,味道還好,更喜歡佢配上大量的菜蔬,來平衡一下。


香港的確無乜邊間的紅油抄手是出色,包括這裡。是辣的,但辣味比較單調,還幸抄手唔怕甩皮甩骨。


以上的東西可以當無睇過,因為主角始終是梳乎厘班戟。蠻巨大的,千萬不要懶醒一人一份,開心些牙就好。

厚身而帶點結實的班戟,味道唔錯,跟黑糖珍珠沒半點違和感,是有水準的出品,但要與Woosa去相提並論,又誇左少少。


熱的仁參烏龍珍珠奶茶,端上桌時香噴噴,但珍珠是太腍身,跟剛才班戟的珍珠,完全不同。




餐廳資料:
Teawood Deluxe
尖沙咀河內道18號K11購物藝術館B1樓B105-B106號舖
26683300

6 則留言: