Fabrice 嚐味: Canton Pot - 天冷要吃火鍋

2018年12月19日星期三

食物：$$$$

環境：$$$$

服務：$$$$

我覺得自己好醒，比天文台更快更準確，預測到本年度(暫時)最凍的一天，老早約齊班朋友去打邊邊，哈哈～

再來Canton Pot，因佢有個好大的優勢，就係房間夠多，岩晒我哋呢班嘈喧巴閉既嘩鬼，唔怕騷擾到人。

是夜我們很瘋癲，他人一定看不穿，事關我哋十三人，共開了五個鍋，當中包括了兩款期間限定的醉鍋。

醉鍋之一，乃火焰太白醉蝦鍋。將生猛的海蝦灌醉，點火整熟，再加湯作火鍋湯底。海鮮夠晒新鮮，因此肉很爽，還散發濃烈之酒香，先吃整蝦已很滿足。

另一款醉鍋，係花雕藥膳醉雞鍋，既可食肉，又有湯飲。少試一口湯，果然足料，非常暖物，寒天下的最佳選擇。有幸分到雞髀位置，肉質嫩滑又夠香，正！

仲有麻辣鍋，以及野菌鍋。愛清淡或者重口味的朋友都找到心頭好。

而我『長駐』的一個湯底，正是星洲肉骨茶湯底。呷口湯，真帶新加坡風味，與油炸鬼，是絕配。

作為食肉獸，點咩湯底都好，肉類還是很重要。是夜的本地新鮮牛頸脊，一如以往的高質，質感軟腍，牛香豐富，教人一片駁一片的放入口中。

許多朋友都已不是首次前來，大家對這兒的髦毛豬念念不忘，今次誓要重溫美味，結果不負眾望。

再一款豬，匈牙利橡果黑豚肉，看其雪花紋理都知道唔講得笑，吃起來肉質好之餘，亦帶出點點甜味，真不賴。

孜然羊肉丸係期間限定，始終冬天才最岩。很有個性的丸子，滲出陣陣孜然香，愛羊肉的朋友一定超滿足，否則可能頂唔住。

兩款餃子包得好靚仔，而且均是重口味之選，分別有重慶豚肉餃，以及黑蒜京蔥羊肉餃。

每人整多隻鮮甜的象拔蚌仔，太過滿足。

第一次食花生芽，爽脆又甜美的莖與花生頭，有趣。

黃耳單看色澤，已經知道是新鮮貨色，吃起來當然與別不同。另再吃少少白菜和超甜粟，已飽到上心口。

各自點上心儀的甜品，楊枝甘露水滴、紫薯布甸、火焰香燈朱古力波都值得一試，仲有我既選擇，木糠布甸。

做冬除左傳統的中菜選擇，仲可以打邊邊啦！同老媽子提議下先～

2018年12月19日 星期三