2018年11月25日 星期日

新店速遞:Rose Cafe - 工廈覓食停不了



食物:$$$
環境:$$$1/2
服務:$$$1/2

近排在火炭出沒比較多,曾經很熟悉的一個地區,四年後多了唔少餐廳食肆,包括樓上Cafe

舊朋友,心未必緊扣,卻仍要好好去保留,所以時間夾到,就相約食個午餐。

又是向工廈的樓上食店進發,朋友發現了一間新開張不久的,露絲咖啡,不妨一齊去做試下。
   


幾款午餐加幾個扒餐,午市選擇十個以內,方便運作。套餐會跟湯 (但無麵包),都是大路的紅白對決。

要了意大利菜湯,雖然多料,味道卻很淡口,麻麻地口胃。


我的選擇係肥牛烏冬,配喇沙湯底。我最著重的,當然是個湯底,可惜只有辣而欠缺層次感,再一次令我失望。肥牛是大路貨色,雞蛋又是淡茂茂,在失去靈魂的湯底之下,豆卜自然顯得失色。反而煙韌的烏冬是最好。


朋友揀食扒餐,雞扒拼薯菜,好港式風格。用上的是波浪薯條,我忍不住吃了兩條。梗唔會期待雞扒有咩驚為天人的味道,吃起來至少沒有一陣雪味,已經收貨。朋友唔知有兩高定三高,現在食雞唔食皮,食肉唔食肥,大嘆失去樂趣。


反而杯咖啡又幾香濃,俾我叉足電下午繼續搏殺。

餐廳資料:
Rose Cafe

2 則留言: